برطانوی پولیس نے ایئربیس پر حملے کی کوشش میں ایران کے ملوث ہونے کی تحقیقات شروع کردی

برطانوی انسداد دہشت گردی پولیس ایئر بیس کو نشانہ بنانے کی کوشش کے معاملے میں ایران کے ملوث ہونے یا نہ ہونے کی تحقیقات کر رہی ہے۔

برطانوی اخبار کے مطابق برطانوی انسداد دہشت گردی پولیس گلوسٹر شائر میں واقع اس ایئر بیس کو نشانہ بنانے کے مشتبہ بم دھماکے کے منصوبے کے پیچھے ایران کے ہونے کے امکان کی گہرائی سے تحقیقات کر رہی ہے، جسے امریکی فضائیہ ایران کے خلاف اپنے فوجی آپریشنز میں استعمال کر رہی ہے۔

برطانوی حکام نے دھماکہ خیز مواد کے قانون کے تحت خلاف ورزیوں اور دہشت گردانہ کارروائی کی تیاری کے شبہ میں پانچ افراد کو حراست میں لے لیا ہے۔ اتوار کی صبح سویرے بیس کی طرف بڑھتے ہوئے تین مشتبہ ٹرک دیکھے جانے کے بعد یہ گرفتاری عمل میں آئی ہے۔

یہ بھی پڑھیں : امریکہ کا ایران پر انتظار کرو، دباؤ بڑھاؤ کی خطرناک پالیسی اور ٹرمپ کا سیاسی جوا

تفتیش کار اس منصوبے کے محرکات کا مطالعہ کر رہے ہیں، جن میں روسی تخریب کاری یا انتہا پسند گروہوں سے رابطہ بھی شامل ہے، لیکن ذرائع کا کہنا ہے کہ ایران سے منسلک محرک کو سب سے زیادہ ممکنہ وجہ سمجھا جا رہا ہے۔

اگر تہران کے ساتھ تعلق کی تصدیق ہوتی ہے تو یہ آپریشن براہ راست ایران سے منسلک عناصر کے ذریعے کیا گیا ہوگا۔

ادھر برطانوی وزیر دفاع ویس اسٹریٹنگ کا کہنا ہے کہ اس بارے میں قیاس آرائیاں کرنا نامناسب ہوگا کہ گرفتار افراد کے کیا مقاصد تھے۔

انہوں نے کہا کہ وہ فی الحال ایران کے ساتھ اس واقعے کا کوئی تعلق جوڑ نہیں رہے ہیں کیونکہ انسداد دہشت گردی کے افسران اس بات کا تعین کرنے کی کوشش کر رہے ہیں کہ آر اے ایف فیئر فورڈ کے قریب دراصل کیا ہوا تھا۔