ایران جنگ کے اثرات، امریکہ میں غذائی مہنگائی کا ایک سالہ ریکارڈ ٹوٹ گیا

امریکہ میں اشیائے خوردونوش کی قیمتوں میں ہوش ربا اضافے نے گزشتہ ایک سال کے تمام ریکارڈ توڑ دیے ہیں۔ اعداد و شمار کے مطابق غذائی اجناس کی قیمتوں میں غیر معمولی تیزی دیکھی گئی ہے۔

امریکہ میں خوراک اور مشروبات کی صنعت سے وابستہ کمپنیوں کے لیے مہنگائی کی شرح میں سات اعشاریہ نو فیصد کا بڑا اضافہ ریکارڈ کیا گیا ہے۔

یہ گزشتہ بارہ ماہ کے دوران ہونے والا سب سے بڑا اضافہ ہے، جو کہ فروری کے مقابلے میں 373 بیسس پوائنٹس کی چھلانگ کو ظاہر کرتا ہے۔ اس صورتحال نے امریکی مارکیٹ اور صارفین میں تشویش کی لہر دوڑا دی ہے۔

سب سے زیادہ اضافہ سبزیوں اور ایندھن کی قیمتوں میں دیکھا گیا ہے۔ ٹماٹر کی قیمتوں میں سالانہ بنیادوں پر ایک سو دو فیصد جبکہ عام سبزیوں کی قیمتوں میں نوے فیصد تک کا بڑا اضافہ ہوا ہے۔

یہ بھی پڑھیں : ایران امریکہ مذاکرات میں تعطل، دونوں ممالک کے وفود پاکستان سے روانہ

اس کے ساتھ ساتھ ڈیزل کی قیمتوں میں اٹھاسی فیصد اضافہ ہوا ہے، جس نے لاجسٹکس اور نقل و حمل کے اخراجات کو آسمان پر پہنچا دیا ہے۔

ماہرین کا کہنا ہے کہ اس اضافے کی بڑی وجہ ایندھن کی بڑھتی ہوئی قیمتیں ہیں، تاہم ابھی اصل اثرات سامنے آنا باقی ہیں۔ کھاد اور پلاسٹک کی قیمتوں میں ہونے والا اضافہ ابھی سپلائی چین کے مراحل میں ہے، جو جلد صارفین تک پہنچے گا۔

دنیا میں سب سے زیادہ استعمال ہونے والی نائٹروجن کھاد ‘یوریا’ کی قیمتیں فروری سے اب تک دگنی ہو چکی ہیں اور اس وقت نو سو ڈالر فی میٹرک ٹن کی سطح پر ہیں، جو کہ دو ہزار بائی کے بعد بلند ترین سطح ہے۔ کسانوں پر بڑھنے والا یہ بوجھ جلد ہی ہول سیل قیمتوں کی صورت میں عام دکانوں اور اسٹورز تک پہنچے گا۔

دوسری جانب امریکی بیورو آف لیبر اسٹیٹسٹکس کے سرکاری اعداد و شمار میں مجموعی طور پر غذائی مہنگائی میں دو اعشاریہ سات فیصد اضافہ دکھایا گیا ہے، لیکن صنعت کی سطح پر ہونے والا بڑا اضافہ اس بات کا اشارہ ہے کہ مستقبل میں قیمتوں کا یہ دباؤ مزید بڑھے گا۔

آبنائے ہرمز میں کشیدگی کی وجہ سے کھاد کی سپلائی میں کمی اور یوریا کی قیمتوں میں اضافے نے امریکی فوڈ سیکیورٹی کے لیے خطرے کی گھنٹی بجا دی ہے۔