سندھ کے ضلع سانگھڑ میں تیل اور گیس کا بڑا ذخیرہ دریافت

او جی ڈی سی ایل نے سندھ کے ضلع سانگھڑ میں اپنے بوبی اور دھمراکی مائننگ لیز کے بوبی ڈیپ ون کنویں سے تیل اور گیس کا ایک بڑا ذخیرہ دریافت کرنے کا اعلان کیا ہے۔

پاکستان میں انرجی سیکیورٹی کے حوالے سے ایک بڑی اور اہم کامیابی سامنے آئی ہے، جہاں آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے سندھ کے صوبے میں واقع ضلع سانگھڑ کے بوبی اور دھمراکی مائننگ لیز میں اپنے معلوماتی اور تلاش کے کنویں بوبی ڈیپ ون سے تیل اور گیس کی ایک بڑی دریافت کا اعلان کیا ہے۔

او جی ڈی سی ایل اس مائننگ لیز میں 100 فیصد ورکنگ انٹرسٹ کے ساتھ بطور آپریٹر کام کر رہی ہے۔ کمپنی کی جانب سے پاکستان اسٹاک ایکسچینج، لندن اسٹاک ایکسچینج اور سیکیورٹیز اینڈ ایکسچینج کمیشن آف پاکستان کو بھیجے گئے خط کے مطابق وائرلائن لاگز کی تشریح کی بنیاد پر لوئر گورو فارمیشن کے میسو سینڈ ایریا کا ٹیسٹ کیا گیا۔

اس کامیاب ٹیسٹ کے نتیجے میں اس کنویں سے روزانہ 2,000 بیرل خام تیل اور 1.1 ملین اسٹینڈرڈ مکعب فٹ گیس پیدا ہو رہی ہے۔ یہ ٹیسٹ 32 بٹا 64 انچ کے چوک سائز پر کیا گیا۔

یہ بھی پڑھیں : سندھ: ضلع ٹنڈو الہ یار سے تیل اور گیس دریافت

یہ دریافت بوبی اور دھمراکی مائننگ لیز میں ایک بہت بڑا سنگ میل ہے کیونکہ یہ اس علاقے کے میسو سینڈ حصے سے تیل اور گیس کی پہلی دریافت ہے۔

اس کامیابی نے نہ صرف خطے میں تلاش کے ایک نئے راستے کو قائم کیا ہے بلکہ آس پاس کے دیگر ممکنہ علاقوں میں بھی مستقبل کی تلاش اور وسائل کی ترقی کے لیے نئی راہیں کھول دی ہیں۔

توقع کی جا رہی ہے کہ یہ نئی دریافت ملکی وسائل کے ذریعے پاکستان میں توانائی کی طلب اور رسد کے درمیان موجود فرق کو کم کرنے میں مددگار ثابت ہوگی جبکہ اس سے او جی ڈی سی ایل اور ملک کے مجموعی ہائیڈرو کاربن کے ذخائر کے بیس میں بھی بڑا اضافہ ہوگا۔

یہ کامیابی پاکستان کے دیگر زونل بیسنز میں ملکی انرجی سیکیورٹی کو سپورٹ کرنے کی بہترین صلاحیت کو بھی ظاہر کرتی ہے۔