تعلیمی اداروں سے متعلق حکومت کا اچانک بڑا فیصلہ

خیبرپختونخوا حکومت نے صوبے کے سرکاری اسکولوں کے لیے نیا اور یکساں تعلیمی ٹائم ٹیبل نافذ کر دیا ہے۔

 اس حوالے سے باقاعدہ اعلامیہ بھی جاری کر دیا گیا ہے۔ نئے نظام کا اطلاق جماعت اول سے بارہویں جماعت تک ہوگا۔ اس کا مقصد تعلیمی نظام کو زیادہ منظم اور یکساں بنانا بتایا جا رہا ہے۔

محکمہ تعلیم کے مطابق اب موسم گرما اور سرما دونوں میں ایک ہی طرح کا تعلیمی شیڈول ہوگا۔ اس فیصلے سے مختلف علاقوں کے اسکولوں میں اوقات کی الجھن ختم ہو جائے گی۔ اس سے تدریسی عمل میں بہتری آئے گی اور طلبہ کا تعلیمی وقت بہتر انداز میں استعمال ہوگا۔

اعلامیے میں اسکول انتظامیہ کو ہدایت دی گئی ہے کہ اساتذہ کے ورک لوڈ کو واضح اور منصفانہ انداز میں تقسیم کیا جائے۔ ساتھ ہی تدریسی سرگرمیوں کی نگرانی کو بھی سخت بنانے کا کہا گیا ہے تاکہ نئے ٹائم ٹیبل پر مکمل عملدرآمد یقینی بنایا جا سکے۔

نئے شیڈول کے تحت آٹھویں پیریڈ کو خصوصی طور پر ہم نصابی سرگرمیوں کے لیے مختص کیا گیا ہے۔ اس کے ساتھ ہر ہائر سیکنڈری اسکول میں مختلف طلبہ سوسائٹیز قائم کرنا لازمی قرار دیا گیا ہے۔ ان میں ادبی، سائنسی، فنون لطیفہ، سیرت النبی ﷺ اور کمیونٹی سروس سوسائٹیز شامل ہوں گی۔

محکمہ تعلیم نے یہ بھی ہدایت دی ہے کہ اساتذہ اپنی حاضری رجسٹر اور سرگرمی لاگ بُک کو باقاعدگی سے اپ ڈیٹ رکھیں۔ ضلعی تعلیمی افسران کو اس نظام پر مکمل عملدرآمد یقینی بنانے کی ذمہ داری دی گئی ہے۔