طالبان کا پاکستان کو اکسانا انہیں مہنگا پڑے گا، بلوچستان میں 4 ڈرونز تباہ کرنے کے بعد پاک فوج کا سخت پیغام

پاکستان کے فضائی دفاعی نظام نے بلوچستان میں سرحد پار سے آنے والے افغان طالبان کے 4 ڈرونز کو کامیابی سے تباہ کر کے دہشت گردی کی کوشش ناکام بنا دی۔

پاک فوج کے شعبہ تعلقات عامہ آئی ایس پی آر کے مطابق 30 جون کو افغان طالبان حکومت نے اپنی سر زمین سے کام کرنے والی دہشت گرد تنظیموں کی پشت پناہی اور حمایت کرتے ہوئے بلوچستان میں سرحد پار 4 عام نوعیت کے ڈرون طیارے روانہ کیے۔

ترجمان کا کہنا تھا کہ ان معاندانہ فضائی پلیٹ فارمز کو پاکستان کے مضبوط فضائی دفاعی نیٹ ورک نے فوری طور پر پکڑ لیا۔ اعلیٰ آپریشنل تیاری کا مظاہرہ کرتے ہوئے سیکیورٹی فورسز نے جدید جوابی اقدامات کا استعمال کرتے ہوئے آنے والے تمام 4 ڈرونز کو کامیابی سے ناکام بنا دیا۔ تیز رفتار اور مؤثر ردعمل کی وجہ سے یہ مذموم کوششیں مکمل طور پر ناکام ہو گئیں۔

یہ بھی پڑھیں : افغان ناظم الامور دفتر خارجہ طلب، کراچی حملے میں افغان شہریوں کے ملوث ہونے پر ڈیمارش جاری

آئی ایس پی آر نے کہا کہ افغان طالبان حکومت کے ایسے ہتھکنڈوں کا مقصد اپنی جابرانہ حکومت کے تحت پسنے والی افغان آبادی کو گمراہ کرنا ہے۔ افغان طالبان کو یہ سمجھنا چاہیے کہ ان کا یہ غیر ذمہ دارانہ رویہ افغان عوام کی مشکلات میں اضافہ کر رہا ہے۔

بیان میں مزید کہا گیا کہ وہ ایسی کھوکھلی بیان بازی سے اپنی آبادی کو مطمئن کرنے کی کوشش کرنے کے بجائے دہشت گردی کی سرپرستی ترک کریں اور پرامن بقائے باہمی کے اصول پر عمل کریں۔

ترجمان نے واضح کردیا کہ اگر افغان طالبان نے پاکستان کو اکسانا جاری رکھا تو انہیں منہ توڑ جواب دیا جائے گا، جو انہیں بہت مہنگا پڑے گا۔ پاکستان کی مسلح افواج مادر وطن کے ایک ایک انچ کے دفاع کے لیے مکمل طور پر چوکنا اور اہل ہیں۔

ترجمان کا کہنا تھا کہ پاکستان کی خودمختاری کو خطرے میں ڈالنے اور ہمارے لوگوں کو خطرے میں ڈالنے والی کسی بھی مہم جوئی یا سرحد پار اشتعال انگیزی کا آپریشن غضب الحق کے تحت تیز رفتار، فیصلہ کن اور زبردست جواب دیا جاتا رہے گا۔