جنگ بندی سے قبل حزب اللہ کی طوفانی کارروائیاں، اسرائیل پر 75 حملے

حزب اللہ نے جنگ بندی کے نفاذ سے قبل آخری 24 گھنٹوں کے دوران اسرائیلی فوج اور بستیوں پر 75 حملے کر کے دشمن کو بھاری نقصان پہنچانے کا دعویٰ کیا ہے۔

لبنان اور اسرائیل کے درمیان جنگ بندی کے باضابطہ نفاذ سے پہلے کے آخری 24 گھنٹے انتہائی پرتشدد رہے۔ حزب اللہ کی جانب سے جاری کردہ بیان میں کہا گیا ہے کہ ان کے جنگجوؤں نے اس مختصر دورانیے میں مجموعی طور پر 75 حملے کیے۔

ان حملوں میں سے 38 کارروائیاں لبنانی سرزمین کے اندر موجود اسرائیلی فوجیوں کے خلاف کی گئیں، جبکہ 37 حملے مقبوضہ فلسطین کے شمالی علاقوں اور اسرائیلی بستیوں پر کیے گئے۔

یہ بھی پڑھیں : لبنان سے خطرہ محسوس ہوا تو خاموش نہیں بیٹھیں گے، اسرائیلی سفیر

حزب اللہ کا کہنا ہے کہ ان حملوں کا مقصد دشمن کو یہ پیغام دینا تھا کہ مزاحمت مکمل طور پر فعال اور دفاع کے لیے تیار ہے۔

حزب اللہ کے مطابق ان کے اہداف میں تین اہم فوجی اڈے، پچیس بستیاں اور شہر، چار فوجی بیرکیں اور پانچ سرحدی چوکیاں شامل تھیں۔

ان حملوں میں جدید راکٹوں اور آرٹلری کا استعمال کیا گیا، جس کے نتیجے میں متعدد مقامات پر آگ لگنے اور تنصیبات کو نقصان پہنچنے کی اطلاعات موصول ہوئی ہیں۔

ان کارروائیوں کا سلسلہ جمعرات کی رات بارہ بجے تک جاری رہا، جب تک کہ جنگ بندی کا باضابطہ وقت شروع نہیں ہو گیا۔