عمان میں ملازمت کرنے والے پاکستانیوں کیلئے بڑی خبر آگئی

عمان میں مقیم غیر ملکی ورکرز کے لیے وطن واپسی اور ملک چھوڑنے کے قواعد سے متعلق اہم وضاحت سامنے آئی ہے۔

بیورو آف امیگریشن اور اوورسیز ایمپلائمنٹ کے مطابق نئے ضوابط کا مقصد آجر اور ملازم دونوں کے حقوق اور ذمہ داریوں کو واضح کرنا ہے تاکہ کسی بھی قسم کے تنازع سے بچا جا سکے۔

قوانین کے آرٹیکل 14 کے تحت جب ملازمت کا معاہدہ ختم ہو جائے تو آجر کی ذمہ داری ہے کہ وہ اپنے خرچ پر ملازم کو زیادہ سے زیادہ ساٹھ دن کے اندر اس کے وطن یا طے شدہ مقام تک واپس بھیجنے کا انتظام کرے۔ ساتھ ہی آجر کو پابند کیا گیا ہے کہ وہ فوری طور پر کلیئرنس سرٹیفکیٹ جاری کرے جس میں یہ درج ہو کہ ملازم پر کوئی واجبات باقی نہیں۔

اگر کوئی ملازم خود واپسی سے انکار کرے تو حکومتی ادارے اسے سرکاری خرچ پر واپس بھیج سکتے ہیں، تاہم یہ اخراجات بعد میں آجر سے وصول کیے جا سکتے ہیں۔ اسی طرح اگر کسی ملازم کا قانونی کیس زیرِ سماعت ہو تو اسے ملک میں رہنے کی اجازت دی جائے گی تاکہ وہ اپنا قانونی حق استعمال کر سکے۔

آرٹیکل 15 کے مطابق لیبر حکام کو یہ اختیار بھی دیا گیا ہے کہ وہ مخصوص حالات میں غیر ملکی ورکرز کی واپسی کو ریگولیٹ کریں۔ اس میں طبی طور پر نااہلی، جعلی دستاویزات یا بغیر اجازت ملازمت چھوڑنے جیسے معاملات شامل ہیں۔

اسی طرح ملک چھوڑنے کے عمل میں شفافیت کے لیے آجر کو لازمی قرار دیا گیا ہے کہ وہ ملازم کو اینڈ آف سروس سرٹیفکیٹ بغیر کسی فیس کے فراہم کرے۔ اس سرٹیفکیٹ میں ملازمت کی مکمل تفصیل، تنخواہ اور دیگر مراعات درج ہوں گی۔ آجر کو یہ بھی یقینی بنانا ہوگا کہ ملازم کے تمام ذاتی کاغذات واپس کیے جائیں۔

قوانین میں غیر قانونی کام کرنے والوں کے خلاف سخت اقدامات بھی شامل ہیں۔ اگر کوئی غیر ملکی ملازم اپنی اجازت کے بغیر کام کرتا پایا جائے تو اسے ملک بدر کیا جا سکتا ہے اور اس پر دوبارہ داخلے کی پابندی بھی لگ سکتی ہے۔