شدید تنقید کے بعد پی سی بی نے اعظم خان پر عائد جرمانہ ختم کردیا

کراچی: پاکستان کرکٹ بورڈ نے شدید تنقید کے بعد نوجوان کرکٹر اعظم خان پر عائد جرمانے کو ختم کردیا۔

بورڈ کی جانب سے جاری اعلامیے کے مطابق کرکٹر پر میچ کے دوران بلے پر فلسطینی جھنڈے کا اسٹیکر لگا کر کھیلے پر ریفریز کی جانب سے میچ فیس کی پر عائد کردہ 50 فیصد جرمانے کو ختم کردیا گیا ہے۔

اعلامیے میں کہا گیا ہے کہ اعظم خان نے پی سی بی کے ضابطہ اخلاق کے آرٹیکل 2.4 کی خلاف ورزی کی تھی اورایک امپائر کی ہدایت کے باوجود انہوں نے اسٹیکر نہیں ہٹایا۔

یہ بھی پڑھیں: بیٹ پر فلسطین کا جھنڈا، اعظم خان کو بڑا جرمانہ کردیا گیا

بورڈ کے مطابق کھلاڑی اور ٹیم آفیشلز کو اس بات کی اجازت نہیں ہے کہ وہ کوئی ایسی چیز پہنیں اور دکھائیں یا اپنے ذاتی پیغامات اپنے ساز و سامان کے ذریعے پیش کریں، اس کے لیے پلیئر یا ٹیم آفیشلز ایسوسی ایشن اور پی سی بی کرکٹ آپریشنز ڈیپارٹمنٹ کی پیشگی منظوری ضروری ہے۔

دوسری جانب پاکستان کرکٹ بورڈ کو فلسطین کی حمایت پر کرکٹر پر جرمانے کے بعد شائقین کرکٹ کی جانب سے شدید تنقید کا سامنا ہے۔

خیال رہے کہ پی سی بی اس اقدام کے بعد کرکٹ بورڈ کے خلاف شائقین نے اسٹیڈیم کے باہر احتجاج کیا تھا۔

اس کے علاوہ پی سی بی کے فیصلے کے خلاف ملک بھر میں اعظم خان کے حق میں آواز بلند ہوئی جبکہ سوشل میڈیا پلیٹ فارم ایکس (سابقہ ٹوئٹر) پر #AzamKhan دو دن تک ٹاپ ٹرینڈ پر رہا۔