بابر اعظم کے والد بیٹے کی حمایت میں ایک بار پھر سامنے آگئے

قومی کرکٹ ٹیم کے سابق کپتان کے والد اعظم صدیق بری کارکردگی کی وجہ سے ہونے والی تنقید پر بیٹے بابر اعظم کی حمایت میں ایک بار پھر سامنے آگئے۔

اعظم صدیق نے سوشل میڈیا پر جاری بیان میں کہا آئی سی سی ٹی ٹوئنٹی ٹیم آف دی ائیر کے رکن اور کیپ ملنے کے بعد بابر اعظم ڈراپ ہوئے، بابر اعظم نیشنل ٹی ٹوئنٹی اور پی ایس ایل میں پرفارم کر کے دوبارہ واپس آجائے گا۔

مزید پڑھیں:چیمپئنز ٹرافی؛ نوجوت سنگھ سدھو نے بابر اعظم کے ناقدین کو کیا مشورہ دیا؟

اعظم صدیق نے لکھا سابق کھلاڑیوں سے درخواست ہے کہ وہ الفاظ کا چناؤ ٹھیک رکھیں، ایسا نہ ہو کہ کوئی پلٹ کر جواب دے تو برداشت نہ ہو، آپ ماضی ہیں دوبارہ نہیں کھیلیں گے۔

اعظم صدیق نے کہا کہ جو چیخ و پکار کر رہے ہیں انکی اپنے دور میں کیا کارکردگی رہی ہے، پی سی بی کی ویب سائٹ ایک بار دیکھ لیا کریں، عقل مندوں کے لیے اشارہ کافی ہے۔

خیال رہے کہ بابر اعظم کو آئی سی سی چیمپئنز ٹرافی اور اس سے قبل نیوزی لینڈ اور آسٹریلیا کے خلاف سیریز میں بری فارم کی وجہ سے شدید تنقید کا نشانہ بنایا جا رہا ہے۔