پاک بھارت کرکٹ سیریز سے متعلق اہم خبر سامنے آگئی

پاکستان اور بھارت کے درمیان تقریبا 12 سال سے باہمی کرکٹ نہیں کھیلی گئی تاہم اب اس حوالے سے ایک بڑی خبر سامنے آئی ہے۔

دونوں روایتی حریف ایک دوسرے کے خلاف آئی سی سی یا ایشین کرکٹ کونسل ایونٹس میں ایک دوسرے کے خلاف مدمقابل ہوتے ہیں مگر شائقین کرکٹ باہمی سیریز میں بھی مدمقابل دیکھنے کے لیے بے قرار ہیں۔

اب اطلاعات یہ ہیں کہ پاکستان اور بھارت دونوں ممالک کے درمیان سیریز کے لیے مذاکرات جاری ہیں۔

چیمپئنز ٹرافی کا سیمی فائنل دیکھنے کے لیے پاکستان آنے والے بھارتی کرکٹ بورڈ کے نائب صدر راجیو شکلا نے قذافی اسٹیڈیم لاہور میں میڈیا سے گفتگو میں باہمی سیریز سے متعلق سوال کے جواب میں کہا کہ پاک بھارت کرکٹ سیریز پر مذاکرات چل رہے ہیں۔

راجیو شکلا کا کہنا تھا کہ اگر پاک بھارت باہمی کرکٹ سیریز ہوئی تو نیوٹرل وینیو پر نہیں بلکہ ایک دوسرے کے ملک میں ہوگی۔

بی سی سی آئی کے نائب صدر نے کہا کہ بھارتی حکومت کا فیصلہ ہے کہ سیریز جب بھی ہوگی اپنے اپنے ممالک میں ہوگی۔

ان کا کہنا تھا کہ سیریز نیوٹرل وینیو پر نہیں ہوگی، البتہ جہاں تک دیگر ممالک کی بات ہے تو دنیا تو پاک بھارت میچز کرانے کی پیشکش کرے گی۔

واضح رہے کہ پاکستان اور بھارت کے درمیان آخری ٹیسٹ سیریز 2008 میں ہوئی تھی۔

ممبئی دھماکوں کے بعد بھارت نے دو طرفہ کرکٹ تعلقات ختم کر دیے جب کہ 2012 میں پاکستان نے ون ڈے سیریز کے لیے شاہد آفریدی کی قیادت میں بھارت کا دورہ کیا تھا۔

دوسری جانب بھارت کے کھیلوں کے میدان میں سیاست کو لانے کی وجہ سے کرکٹ کا نقصان ہو رہا ہے۔