کینیڈا جانے کے خواہشمند افراد کیلئے بڑی خوشخبری آگئی

کینیڈا نے 13 ممالک کے شہریوں کے لیے ویزا فری انٹری کی سہولت کا اعلان کر دیا ہے۔

 یہ فیصلہ سیاحت کے فروغ اور بین الاقوامی تعلقات کو مضبوط بنانے کے لیے کیا گیا ہے۔ اس نئی پالیسی کے تحت اہل ممالک کے شہری اب مخصوص شرائط پوری کرنے پر بغیر ویزا کینیڈا کا سفر کر سکیں گے۔

ویزا فری سہولت حاصل کرنے والے مسافر زیادہ سے زیادہ چھ ماہ تک کینیڈا میں قیام کر سکیں گے۔ تاہم اس کے لیے ضروری ہے کہ وہ ہوائی سفر کے ذریعے داخل ہوں اور گزشتہ 10 برسوں میں کبھی کینیڈا ویزا حاصل کیا ہو یا موجودہ طور پر امریکا کا نان امیگرنٹ ویزا رکھیں۔ کینیڈا میں داخلے کے لیے الیکٹرانک ٹریول آتھرائزیشن (eTA) لازمی ہوگی، جو ڈیجیٹل اجازت نامہ کے طور پر کام کرتی ہے۔

نئی فہرست میں شامل ممالک میں اینٹیگوا اینڈ باربوڈا، ارجنٹینا، کوسٹا ریکا، مراکش، پاناما، فلپائن، سینٹ کٹس اینڈ نیوس، سینٹ لوسیا، سینٹ ونسنٹ اینڈ دی گریناڈینز، سیشلز، تھائی لینڈ، ٹرینیڈاڈ اینڈ ٹوباگو اور یوراگوئے شامل ہیں۔ خاص طور پر کیریبین ممالک کے ساتھ سفارتی تعلقات کے حوالے سے یہ ایک مثبت پیش رفت تصور کی جا رہی ہے۔

کینیڈین حکام کے مطابق یہ پالیسی نہ صرف سیاحوں کے لیے آسانی پیدا کرے گی بلکہ کینیڈا کو عالمی مسافروں کے لیے مزید پرکشش بھی بنائے گی۔ اس اقدام سے بین الاقوامی روابط مضبوط ہوں گے اور سیاحت میں اضافہ ہونے کے امکانات بڑھ جائیں گے۔