ٹی ٹوئنٹی ورلڈ کپ 2026 شروع ہونے سے قبل نیا تنازع کھڑا ہوگیا

ٹی ٹوئنٹی ورلڈ کپ کے آغاز سے قبل انٹرنیشنل کرکٹ کونسل (ICC) اور عالمی کھلاڑیوں کی تنظیم ورلڈ کرکٹرز ایسوسی ایشن (WCA) کے درمیان کھلاڑیوں کے حقوق کو لے کر نیا تنازع پیدا ہو گیا ہے۔

مسئلہ بنیادی طور پر نام، تصویر اور مماثلت (NIL) کے حقوق اور دیگر کمرشل و ڈیٹا سے متعلق شرائط سے متعلق ہے۔ ورلڈ کرکٹرز ایسوسی ایشن کا کہنا ہے کہ ICC نے جو اسکواڈ پارٹیسپیشن ٹرمز بھیجے ہیں، وہ 2024 میں دونوں تنظیموں کے درمیان طے پانے والے معاہدے کے مطابق نہیں ہیں۔

WCA نے ان شرائط کو کھلاڑیوں کے لیے استحصالی اور ان کے حقوق کمزور کرنے والا قرار دیا ہے۔ ICC کے مطابق 2024 کا معاہدہ صرف آٹھ ممبر بورڈز (آسٹریلیا، انگلینڈ، نیوزی لینڈ، ساؤتھ افریقہ، ویسٹ انڈیز، آئرلینڈ، نیدرلینڈز اور اسکاٹ لینڈ) پر لاگو ہوتا ہے، باقی بورڈز اس کے پابند نہیں۔

WCA کا موقف ہے کہ معاہدہ تمام منسلک کھلاڑیوں پر قانونی طور پر لازم ہے، چاہے وہ اس ورلڈ کپ میں کھیل رہے ہوں یا نہیں۔ WCA کے سی ای او ٹام موفات نے کھلاڑیوں کو بھیجے گئے میمو میں ICC اور 2024 کے معاہدے کے درمیان آٹھ اہم اختلافات کی نشاندہی کی، جن میں میڈیا شوز، کمرے تک رسائی، کھلاڑی کا ڈیٹا، لائسنسنگ، NIL حقوق اور ڈسپیوٹ ریزولوشن شامل ہیں۔

موفات کے مطابق ICC کی شرائط میں کھلاڑیوں سے کہا گیا ہے کہ وہ اپنی NIL کسی بھی تیسرے فریق کو لائسنس کریں، جبکہ قومی بورڈ ہر استعمال کی منظوری دے۔ 2024 کے معاہدے میں یہ حقوق محدود تھے اور کھلاڑی WCA کے ذریعے اپنی شرائط طے کر سکتے تھے۔

ڈیٹا کے استعمال میں بھی واضح فرق ہے: ICC کے ورژن کے مطابق بورڈ کی اجازت سے ڈیٹا کمرشلائز کیا جا سکتا ہے، جبکہ 2024 کے معاہدے میں کھلاڑی خود ڈیٹا کے مالک ہیں اور ان کی منظوری ضروری ہے۔ ICC کے ورژن میں کھلاڑی شرائط پر دستخط کیے بغیر بھی “شرائط قبول شدہ” سمجھے جائیں گے، جب کہ 2024 معاہدے میں ہر ایونٹ کے لیے الگ دستخط ضروری ہیں۔

موفات نے کہا کہ ICC اور ممبر بورڈز نے جان بوجھ کر 2024 کے تحفظات ہٹا دیے ہیں اور کم معاوضہ والی کھلاڑیوں کو غیر منظور شدہ شرائط کے تحت کھیلنے پر مجبور کیا جا رہا ہے۔

ورلڈ کرکٹرز ایسوسی ایشن نے کھلاڑیوں کے حقوق کی حفاظت کے لیے 2024 معاہدے کی پاسداری کا مطالبہ کیا ہے۔