فلسطینیوں کی نسل کشی فوری طور پر روکی جائے : افریقی یونین

افریقی یونین کے 39ویں سربراہی اجلاس میں چیئرمین نے فلسطینی عوام کی نسل کشی فوری طور پر بند کرنے کا مطالبہ کرتے ہوئے کہا ہے کہ مشرق وسطیٰ میں جاری ظلم پوری انسانیت کے ضمیر کو جھنجھوڑ رہا ہے۔

افریقی یونین کے کمیشن کے چیئرمین محمود علی یوسف نے اپنے خطاب میں کہا کہ فلسطین اور اس کے عوام کی تکلیفیں دنیا کے ضمیر کو چیلنج کر رہی ہیں۔ انہوں نے زور دے کر کہا کہ فلسطینی عوام کی نسل کشی کو فوری طور پر روکا جانا چاہیے۔

محمود علی یوسف نے کہا کہ بین الاقوامی قانون اور بین الاقوامی انسانی قانون عالمی برادری کی بنیاد ہیں۔ انہوں نے اسرائیل کی جانب سے غزہ میں انسانی امداد کی ترسیل پر عائد ناکہ بندی ختم کرنے کا مطالبہ بھی کیا۔

افریقی یونین کے سربراہ نے اپنے خطاب میں براعظم افریقہ میں جاری متعدد تنازعات پر بھی گہری تشویش کا اظہار کیا اور پورے خطے سے جنگ ختم کرنے کا مطالبہ بھی کیا۔ انہوں نے کہا کہ سوڈان سے لے کر ساحل کے خطے تک، جمہوریہ کانگو کے مشرقی علاقوں سے صومالیہ تک، افریقی عوام عدم استحکام کی بھاری قیمت چکا رہے ہیں۔

دو روزہ سربراہی اجلاس میں افریقی یونین کے 55 رکن ممالک کے سربراہان شریک ہیں۔ اجلاس میں تباہ کن جنگوں، علاقائی سلامتی، حکمرانی کے مسائل، جمہوریت کو درپیش خطرات اور ماحولیاتی تبدیلی جیسے اہم موضوعات زیر بحث آئیں گے۔ اس سال اجلاس کا مرکزی موضوع پانی کی صفائی اور پانی سے جڑے ماحولیاتی جھٹکے ہیں۔