ایران کا نیا سپریم لیڈر ہمارا اگلا ہدف ہوگا، اسرائیلی وزیر دفاع

اسرائیل کے وزیرِ دفاع اسرائیل کاٹز نے اعلان کیا ہے کہ ان کی فوج ایران کے نئے سپریم لیڈر یا سید علی خامنہ ای کے کسی بھی جانشین کو نشانہ بنانے سے گریز نہیں کرے گی۔

اسرائیل کے وزیرِ دفاع اسرائیل کاٹز نے کہا ہے کہ اسرائیل، ایرانی حکومت کی جانب سے سید علی خامنہ ای کا جانشین مقرر کیے جانے والے کسی بھی لیڈر کو ہلاک کرنے کی کوشش کرے گا۔

یہ بھی پڑھیں : مقبوضہ فلسطین میں ایران کی حمایت کے الزام میں 4 افراد گرفتار

کاٹز کا کہنا تھا کہ ایسا کوئی بھی رہنما جو اسرائیل کی تباہی کے منصوبے کو آگے بڑھانے، امریکہ اور آزاد دنیا کو دھمکانے یا خطے کے ممالک کے لیے خطرہ بننے کا ارادہ رکھتا ہو، وہ اسرائیل کی ہٹ لسٹ پر ہوگا۔

ان کا کہنا تھا کہ اس کا نام کچھ بھی ہو یا وہ کہیں بھی چھپا ہو، اسے ختم کرنا ہمارا واضح ہدف ہوگا۔ اسرائیل امریکہ کے ساتھ مل کر ایران کی فوجی اور جوہری صلاحیتوں کو تباہ کرنے کا سلسلہ جاری رکھے گا۔

انہوں نے یہ دعویٰ بھی کیا کہ اسرائیل ایسی صورتحال پیدا کر دے گا کہ ایرانی عوام خود اپنی حکومت کا تختہ الٹ دیں۔ اسرائیل کاٹز کے مطابق ان کی حکمتِ عملی کا مقصد ایران کے انقلابی نظام کو جڑ سے اکھاڑ پھینکنا ہے۔