عباس عراقچی نے برطانوی فضائی اڈے کے واقعے میں ایران کے ملوث ہونے کے الزامات کو مسترد کردیا

ایرانی وزیر خارجہ نے برطانوی فضائی اڈے کے قریب ہونے والے واقعے سے تہران کو جوڑنے کی برطانوی کوششوں کو سختی سے مسترد کر دیا۔

ایرانی وزیر خارجہ عباس عراقچی نے برطانوی فضائی اسٹیشن آر اے ایف فیئر فورڈ کے قریب واقعے میں ایران کے کردار کے بارے میں برطانیہ کے دعوے کو مسترد کر دیا ہے۔

انہوں نے اس بات پر حیرت کا اظہار کیا کہ لندن ایک طرف تو ایران پر اس قسم کے الزامات عائد کر رہا ہے، جبکہ دوسری طرف برطانوی پولیس نے انہی مشتبہ افراد کو رہا کر دیا ہے۔

یہ بھی پڑھیں : برطانوی پولیس نے ایئربیس پر حملے کی کوشش میں ایران کے ملوث ہونے کی تحقیقات شروع کردی

عباس عراقچی کا کہنا تھا کہ ایران کا یہ ماننا ہے کہ غیر ملکی ریاستوں کے لیے کام کرنے والے مبینہ دہشت گردوں کو رہا کرنا واقعی سب کچھ خود بتا دیتا ہے۔ آپ غلط سمت میں کوشش کر رہے ہیں۔

پیر کے روز برطانوی پولیس نے گلوسٹر شائر میں رائل ایئر فورس کے بیس کے قریب گرفتار کیے گئے پانچ برطانوی شہریوں کو ضمانت پر رہا کر دیا۔ امریکی صدر ڈونلڈ ٹرمپ نے مشتبہ افراد کی رہائی پر حیرت کا اظہار کرتے ہوئے کہا کہ میں ایسا نہیں کرتا۔