ایران جنگ امریکی معیشت پر بوجھ بن گئی، روزانہ اربوں ڈالر کا نقصان

سی این ین کی رپورٹ کے مطابق ایران کے خلاف جنگ کے پہلے سو گھنٹوں کے دوران امریکہ کو تقریباً تین اعشاریہ سات ارب ڈالر کا خرچ اٹھانا پڑا ہے، جس سے امریکی معیشت پر بوجھ بڑھنے کا خدشہ پیدا ہو گیا ہے۔

امریکی نشریاتی ادارے سی این این نے اسٹریٹجک اینڈ انٹرنیشنل اسٹڈیز کے ایک تجزیے کو رپورٹ کیا ہے، جس میں بتایا گیا کہ ایران پر امریکہ اور اسرائیل کی جنگ کے پہلے سو گھنٹے تقریباً تین اعشاریہ سات ارب ڈالر خرچ کرچکے ہیں۔

یہ تخمینہ ظاہر کرتا ہے کہ واشنگٹن جنگ کے آغاز سے اب تک روزانہ آٹھ سو نوے ملین ڈالر سے زیادہ خرچ کر رہا ہے۔

تجزیے کے مطابق کل لاگت میں سے دو سو ملین ڈالر سے کم رقم آپریشنل اخراجات ہیں، جو پہلے ہی پینٹاگون کے موجودہ بجٹ میں شامل ہے۔ باقی تین اعشاریہ پانچ چار ارب ڈالر کے لیے غالباً امریکی محکمہ دفاع کی طرف سے اضافی فنڈنگ کی ضرورت ہوگی۔

آپریشنل اخراجات کے علاوہ مستقبل کے اخراجات کا ایک بڑا حصہ خرچ شدہ اسلحہ، خاص طور پر انٹرسیپٹر میزائلوں کی جگہ لینے میں جائے گا۔ یہ مسئلہ اس وقت سنگین ہے، جب امریکی اور اتحادی میزائل دفاعی ذخائر کے ختم ہونے کے خدشات بڑھ رہے ہیں۔

یہ بھی پڑھیں : دہشت گردی پاکستان کی نئی معاشی حکمتِ عملی میں رکاوٹ ہے : امریکی میڈیا

تجزیہ کاروں کا کہنا ہے کہ جنگ کا مجموعی مالی بوجھ کئی عوامل پر منحصر ہو سکتا ہے، جس میں سستے اسلحہ کی طرف ممکنہ منتقلی، امریکی فوجی کارروائیوں کی شدت اور ایرانی انتقام کا پیمانہ شامل ہے۔ اگر تنازعہ طویل عرصے تک جاری رہتا ہے تو یہ متغیرات کل لاگت کو نمایاں طور پر متاثر کر سکتے ہیں۔

ایران کے خلاف جنگ نے عالمی مالیاتی منڈیوں کو درہم برہم کر دیا ہے، جس سے امریکی سرکاری بانڈز کی طویل ریلی رک گئی ہے اور دس سالہ ٹریژری نوٹ کی پیداوار چار فیصد سے اوپر چلی گئی ہے، جس سے کاروبار اور صارفین کے لیے قرض لینے کی لاگت میں اضافے کے خدشات پیدا ہو گئے ہیں۔

وال سٹریٹ جرنل کی ایک رپورٹ میں بتایا گیا ہے کہ سرمایہ کار اسٹاک مارکیٹ کے اتار چڑھاؤ کے درمیان ٹریژریز کا رخ کر رہے تھے، لیکن مغربی ایشیاء میں حالیہ کشیدگی اور توانائی کی بڑھتی ہوئی قیمتوں نے توجہ افراطِ زر کے خدشات کی طرف موڑ دی ہے۔

رپورٹ میں مزید کہا گیا کہ جنگ نے تیل اور گیس کی قیمتوں میں اضافے میں اہم کردار ادا کیا ہے۔ توانائی کی بلند قیمتیں وسیع تر افراطِ زر کا باعث بن سکتی ہیں، جس سے کاروبار اور صارفین قیمتوں میں مسلسل اضافے کے خدشات ظاہر کر رہے ہیں۔