ایران نے دوبارہ قطر کی توانائی تنصیبات کو نشانہ بنایا تو سخت کارروائی کریں گے، ٹرمپ

امریکی صدر نے ایران کو خبردار کیا ہے کہ اگر اس نے دوبارہ قطر کی توانائی تنصیبات کو نشانہ بنایا تو امریکہ انتہائی سخت کارروائی کرے گا۔

امریکی صدر ڈونلڈ ٹرمپ نے اپنے بیان میں کہا ہے کہ اگر ایران نے دوبارہ قطر کی مائع قدرتی گیس کی تنصیبات کو نشانہ بنایا تو امریکہ انتہائی طاقت کے ساتھ ایران کے جنوبی پارس گیس فیلڈ کو مکمل طور پر تباہ کر سکتا ہے۔

انہوں نے کہا کہ اسرائیل آئندہ جنوبی پارس فیلڈ پر حملہ نہیں کرے گا، جب تک کہ ایران کسی معصوم ملک، جیسے قطر، کو نشانہ بنانے کی غلطی نہیں کرتا۔

یہ بھی پڑھیں : توانائی تنصیبات یا معاشی ڈھانچے پر حملے کا جواب انتہائی سخت اور براہ راست ہوگا، ایران

ٹرمپ کے مطابق امریکہ اس معاملے میں اسرائیل کی مدد کے بغیر بھی کارروائی کر سکتا ہے اور ایسی طاقت استعمال کی جائے گی جو ایران نے پہلے کبھی نہیں دیکھی ہوگی۔

انہوں نے مزید کہا کہ وہ اس سطح کی تباہی کی اجازت دینا نہیں چاہتے کیونکہ اس کے طویل مدتی اثرات ہوں گے، تاہم اگر قطر کو دوبارہ نشانہ بنایا گیا تو وہ ہچکچاہٹ کا مظاہرہ نہیں کریں گے۔