آبنائے ہرمز نہ کھولا گیا تو ایران کو ایک ہی رات میں پتھر کے دور میں بھیج دیں گے، ٹرمپ

امریکی صدر ڈونلڈ ٹرمپ نے ایران کو متنبہ کیا ہے کہ اگر مقررہ وقت تک آبنائے ہرمز کو عالمی توانائی کی ترسیل کے لیے نہ کھولا گیا تو ایران کو ایک ہی رات میں پتھر کے دور میں دھکیل دیا جائے گا۔

امریکی صدر ڈونلڈ ٹرمپ نے ایران کے خلاف جارحانہ لہجہ اختیار کرتے ہوئے اعلان کیا ہے کہ تہران کے پاس اپنی پالیسی درست کرنے کے لیے منگل کی رات آٹھ بجے تک کا وقت ہے۔

صدر ٹرمپ نے واضح طور پر کہا کہ اگر ایران نے عالمی توانائی کی گزرگاہ، آبنائے ہرمز کو دوبارہ کھولنے کے لیے ان کی شرائط کے مطابق معاہدہ نہ کیا تو امریکہ ایک ہی رات میں ایران کو ختم کرنے کی صلاحیت رکھتا ہے۔

انہوں نے دھمکی دی کہ آنے والی رات ایران کے لیے آخری ثابت ہو سکتی ہے، جس کے بعد وہاں نہ بجلی گھر بچیں گے اور نہ ہی پل، اور ملک کو کئی دہائیاں پیچھے پتھر کے دور میں پہنچا دیا جائے گا۔

یہ بھی پڑھیں : ٹرمپ کے بیانات احمقانہ ہیں، دنیا کا نظام ایک پاگل شخص کے حوالے کر دیا گیا، حافظ نعیم

وائٹ ہاؤس میں منعقدہ اس پریس کانفرنس میں ان کے ہمراہ امریکی وزیر دفاع پیٹ ہیگستھ اور جوائنٹ چیفس آف اسٹاف کے چیئرمین جنرل ڈین کین بھی موجود تھے۔

صدر ٹرمپ نے اس موقع پر حال ہی میں ایرانی حدود سے دو امریکی پائلٹوں کو نکالنے کے لیے کیے گئے ریسکیو مشن کی تفصیلات بھی بیان کیں۔

انہوں نے اس مشن کو امریکی تاریخ کا ایک بہادرانہ اور کامیاب ترین آپریشن قرار دیتے ہوئے کہا کہ امریکی افواج نے دشمن کی شدید فائرنگ کے باوجود اپنے جوانوں کو بحفاظت نکالا۔ انہوں نے بتایا کہ اس مشن میں تقریباً دو سو فوجی اہلکاروں اور جدید ترین جنگی طیاروں نے حصہ لیا۔

مذاکرات کے حوالے سے بات کرتے ہوئے صدر ٹرمپ نے ایک طرف تو ایرانی قیادت کی کچھ سطحوں پر ہلاکتوں کا ذکر کیا اور دوسری طرف یہ امید ظاہر کی کہ ایران کے کچھ معقول رہنما نیک نیتی سے بات چیت کر رہے ہیں۔

انہوں نے تصدیق کی کہ پاکستان کی ثالثی میں ہونے والے مذاکرات میں امریکی نائب صدر جے ڈی وینس، اسٹیو وٹکوف اور جیرڈ کشنر سرگرم عمل ہیں۔

جب ان سے پوچھا گیا کہ کیا جے ڈی وینس پاکستان میں ثالثوں سے براہ راست ملاقات کریں گے، تو صدر نے اس کے امکان کو مسترد نہیں کیا۔ دوسری جانب ایران نے کسی بھی عارضی جنگ بندی کو مسترد کرتے ہوئے مستقل امن اور پابندیوں کے خاتمے کا مطالبہ کیا ہے۔

صدر ٹرمپ نے اپنے اتحادیوں، بشمول برطانیہ، ناٹو اور جنوبی کوریا پر بھی کڑی تنقید کی اور کہا کہ ان ممالک نے مشکل وقت میں امریکہ کا ساتھ نہیں دیا، جو ان پر ایک مٹ نہ سکنے والا داغ ہے۔

انہوں نے کہا کہ امریکہ کو اب برطانیہ کی ضرورت نہیں ہے۔ قانونی ماہرین کی جانب سے شہری انفراسٹرکچر پر حملوں کو جنگی جرم قرار دیے جانے کے خدشات پر صدر نے دوٹوک جواب دیا کہ اصل جنگی جرم ایران کو ایٹمی ہتھیاروں کے حصول کی اجازت دینا ہے۔