ایرانی میزائلوں کے ہدف پر درست نشانے میں نو گنا اضافہ، دفاعی ماہرین حیران

امریکی سینٹرل کمانڈ کے مطابق ایران کے خلاف جاری فوجی کارروائیوں میں اب تک تیرہ ہزار اہداف کو نشانہ بنایا جا چکا ہے۔ تاہم، دفاعی ماہرین اس بات پر حیران ہیں کہ اس قدر شدید دباؤ کے باوجود ایران کی میزائل ٹیکنالوجی اور حملوں کی درستگی میں غیر معمولی اضافہ ریکارڈ کیا گیا ہے۔

امریکی فوج کے سینٹرل کمانڈ نے ایران کے خلاف جاری جنگ کے حوالے سے ایک جامع رپورٹ جاری کی ہے، جس کے مطابق 28 فروری سے اب تک امریکی افواج نے ایران کے اندر 13 ہزار سے زائد اہداف کو کامیابی سے نشانہ بنایا ہے۔

اس رپورٹ میں یہ بھی انکشاف کیا گیا ہے کہ اب تک ایران کے 155 بحری جہازوں کو یا تو مکمل طور پر تباہ کر دیا گیا ہے یا انہیں شدید نقصان پہنچا کر ناکارہ بنا دیا گیا ہے۔

ان اعداد و شمار کا مطلب یہ ہے کہ اس جنگ کے دوران روزانہ اوسطاً 370 مقامات پر بمباری کی جا رہی ہے، جو کہ جدید جنگی تاریخ کی شدید ترین مہمات میں سے ایک ہے۔

عسکری تجزیہ نگاروں کا کہنا ہے کہ ان حملوں کے نتیجے میں ایران کی باقاعدہ بحریہ اور فضائیہ تقریباً ختم ہو چکی ہے اور اس کے میزائل ذخائر کو بھی بھاری نقصان پہنچا ہے۔ لیکن اس سب کے باوجود، ایران اب بھی تل ابیب پر کلسٹر گولہ بارود اور میزائلوں کی برسات کر رہا ہے۔

یہ بھی پڑھیں : ایران کے میزائلوں اور ڈرونز سے تازہ حملے، امریکی بحری بیڑے کو پیچھے ہٹنے پر مجبور کردیا

سب سے زیادہ حیران کن انکشاف انسٹی ٹیوٹ فار دی اسٹڈی آف وار نے کیا ہے، جس کے مطابق جنگ کے پہلے دو ہفتوں میں ایرانی میزائلوں کے اپنے ہدف تک پہنچنے کی شرح محض 3 فیصد تھی، جو اب بڑھ کر 27 فیصد تک پہنچ چکی ہے۔ اس کا مطلب یہ ہے کہ امریکہ اور اسرائیل کے جدید ترین فضائی دفاعی نظام کے باوجود اب ایران کا ہر چوتھا میزائل اپنے ہدف کو کامیابی سے نشانہ بنا رہا ہے۔

دفاعی ماہرین اس صورتحال کو لڑ کر سیکھنے کے عمل سے تعبیر کر رہے ہیں۔ رپورٹ کے مطابق یہ جنگ جتنی طویل ہو رہی ہے، ایران اتنا ہی اس جنگ کو لڑنے اور دشمن کے دفاعی نظام میں دراڑیں ڈالنے کا ماہر ہوتا جا رہا ہے۔

یہ تزویراتی تبدیلی واشنگٹن اور تل ابیب کے لیے ایک بڑا لمحہ فکریہ ہے، کیونکہ تمام تر فضائی برتری اور شدید بمباری کے باوجود ایران اپنی میزائل قوت کو مزید مہلک اور درست بنانے میں کامیاب رہا ہے۔

یہ اعداد و شمار ظاہر کرتے ہیں کہ محض انفراسٹرکچر کی تباہی کسی قوم کی جنگی صلاحیت کو مکمل طور پر ختم کرنے کے لیے کافی نہیں ہوتی۔