سولر سسٹم لگوانے والوں کو بڑا جھٹکا

ملک میں سولر سسٹم لگانے والے صارفین کیلئے نیپرا سے لائسنس لینا لازمی قرار دینے پر غور کیا جا رہا ہے۔

وزارتِ توانائی اور پاور ڈویژن کی جانب سے سولر سسٹم سے متعلق نئی ترامیم زیر غور ہیں۔ ان کے تحت گھریلو اور کمرشل صارفین کے لیے نیپرا لائسنس اور اضافی فیس کو لازمی کرنے کی تجویز شامل ہے۔ اس پر حتمی فیصلہ آنے والے دنوں میں متوقع ہے۔

 اس حوالے سے صارفین کا کہنا ہے کہ پہلے ہی سولر سسٹم کی تنصیب مہنگی ہے، اب نئی فیسوں سے اخراجات مزید بڑھ جائیں گے۔ نیٹ میٹرنگ کے بجائے نیٹ بلنگ سسٹم متعارف کروایا جا رہا ہے۔

 نیٹ بلنگ میں بجلی کم قیمت پر خریدی جاتی ہے جبکہ مہنگی قیمت پر فراہم کی جاتی ہے، جس سے بجلی کے بل کم ہونے کے بجائے بڑھنے کا خدشہ ہے۔

سولر صارفین کا کہنا ہے کہ ان اقدامات سے قابلِ تجدید توانائی کے فروغ کو نقصان پہنچ سکتا ہے۔ جو لوگ مہنگی بجلی سے بچنے کے لیے سولر سسٹم لگا رہے تھے، وہ اب دوبارہ سوچنے پر مجبور ہو سکتے ہیں۔