وائٹ ہاؤس حملے کے بعد ٹرمپ کے بال روم منصوبے کیلئے عوامی رائے عامہ کو گمراہ کرنے کا دعویٰ

ٹرمپ نے وائٹ ہاؤس حملے کو اپنے مقاصد کی تکمیل کیلئے بااثر افراد کے ذریعے اپنا بیانیہ پھیلا کر عوام کو گمراہ کرنے کی سوشل میڈیا مہم شروع کردی، ایک ہی مسیج کئی الگ الگ ناموں سے پھیلائے گئے۔

امریکی صدر کی موجودگی میں فائرنگ کے واقعے کے محض دو گھنٹے بعد سوشل میڈیا پر ایک عجیب منظرنامہ دیکھنے کو ملا جہاں 16 بااثر افراد نے ایک ہی وقت میں ایک ہی جیسا پیغام پوسٹ کیا۔ یہ پیغام صدر کی خیریت کے بارے میں نہیں تھا بلکہ ایک مخصوص سیاسی منصوبے کی حمایت میں تھا۔

اس عمل نے اس بحث کو دوبارہ چھیڑ دیا ہے کہ سوشل میڈیا پر جسے ہم عوامی جوش و خروش سمجھتے ہیں، وہ دراصل ایک منظم مشینری کا حصہ ہوتا ہے۔

اس مشینری کے بارے میں چند روز قبل ایشلے سینٹ کلیئر نامی خاتون انفلوئنسر نے اہم انکشافات کئے تھے، جو خود دس سال تک اس نظام کے اندر رہ چکی ہیں۔

یہ بھی پڑھیں : کیا ڈونلڈ ٹرمپ پر حملہ پہلے سے طے شدہ تھا؟ وائٹ ہاؤس ترجمان کی پیش گوئی وائرل

ان کا کہنا تھا کہ سیاسی مشاورتی کمپنیاں آن لائن پورٹلز چلاتی ہیں، جہاں بااثر افراد لاگ ان کر کے موجودہ مہمات دیکھتے ہیں اور مخصوص پیغامات پوسٹ کرنے کے عوض بھاری رقم وصول کرتے ہیں۔ یہ مہمات کسی خاص بل، اسکینڈل یا قانونی کارروائی سے جڑی ہوتی ہیں اور ان کا مقصد عوامی رائے کو تبدیل کرنا ہوتا ہے۔

تحقیقات سے یہ بات سامنے آئی ہے کہ تقریباً 99 فیصد بڑے بااثر افراد کسی نہ کسی صورت میں ادائیگی یا مراعات حاصل کرتے ہیں اور ان سے رازداری کے معاہدے کرائے جاتے ہیں۔

اس کے علاوہ سوشل میڈیا پر خفیہ گروپ بنائے جاتے ہیں، جہاں حکومتی عہدیدار اور انتخابی مہم کے ارکان مل کر پیغامات کو ترتیب دیتے ہیں۔

جب کوئی خبر سامنے آتی ہے تو بڑے اکاؤنٹس پہلے پوسٹ کرتے ہیں اور چھوٹے اکاؤنٹس اسے آگے پھیلاتے ہیں، جس سے عوام کو لگتا ہے کہ یہ ایک قدرتی اتفاق ہے۔

مثال کے طور پر وائٹ ہاؤس میں بال روم کی تعمیر کے دو سو ملین ڈالر کے منصوبے کو فائرنگ کے واقعے کے فوری بعد ہتھیار کے طور پر استعمال کیا گیا تاکہ اس منصوبے کی حمایت حاصل کی جا سکے۔

اگرچہ انفرادی ادائیگیوں کا ثبوت قانونی کارروائی کے بغیر مشکل ہے، لیکن جس طرح یہ پیغامات ایک ہی وقت میں سامنے آتے ہیں، وہ ایک واضح پروپیگنڈا آپریشن کی نشاندہی کرتے ہیں۔

یہ کسی طور پر بھی زمینی سطح کی عوامی توانائی نہیں بلکہ ایک منظم مارکیٹنگ مہم ہے، جسے میڈیا اکثر غلطی سے عوامی رجحان قرار دے دیتا ہے۔