فیفا کا ورلڈ کپ 2026 میں شریک ٹیموں کو بڑا ریلیف دینے کا فیصلہ

فیفا نے ورلڈ کپ 2026 کے لیے اہم تبدیلیوں کی منظوری دے دی ہے۔ اس بار یلو کارڈ سے متعلق قوانین میں نرمی کی گئی ہے تاکہ زیادہ کھلاڑی ناک آؤٹ مرحلے میں حصہ لے سکیں۔

رپورٹس کے مطابق یہ فیصلہ فیفا ورلڈ کپ 2026 کے انتظامی اجلاس میں کیا گیا، جو کینیڈا میں منعقد ہوا۔ نئی پالیسی کا مقصد کھلاڑیوں پر غیر ضروری دباؤ کم کرنا ہے۔

فیصلے کے تحت ٹورنامنٹ کے دوران کھلاڑیوں کا ڈسپلنری ریکارڈ دو مرتبہ صاف کیا جائے گا۔ سب سے پہلے گروپ مرحلے کے اختتام پر سنگل یلو کارڈ ختم کر دیے جائیں گے۔ اس سے کھلاڑی ناک آؤٹ مرحلے میں بغیر کسی دباؤ کے میدان میں اتریں گے۔

اسی طرح کوارٹر فائنل کے بعد بھی یلو کارڈ ریکارڈ دوبارہ ختم کر دیا جائے گا۔ اس کا مطلب ہے کہ سیمی فائنل میں پہنچنے والی ٹیموں کے کھلاڑی ایک اور موقع حاصل کریں گے اور معطلی کے خطرے سے کافی حد تک بچ جائیں گے۔

ماضی میں قوانین مختلف تھے۔ پہلے یلو کارڈ کو صرف کوارٹر فائنل کے بعد ختم کیا جاتا تھا۔ اس وجہ سے اگر کوئی کھلاڑی سیمی فائنل میں یلو کارڈ لیتا تو وہ فائنل میچ کھیلنے سے محروم ہو جاتا تھا۔

فیفا نے یہ تبدیلی اس لیے کی ہے کیونکہ اس بار ورلڈ کپ میں ٹیموں کی تعداد بڑھا کر 48 کر دی گئی ہے۔ اضافی ناک آؤٹ راؤنڈ کے باعث شیڈول بھی طویل ہو گیا ہے، جس کے لیے قوانین میں نرمی ضروری سمجھی گئی۔

اس کے علاوہ فیفا نے مالی مراعات میں بھی بڑا اضافہ کیا ہے۔ تنظیم کے مطابق اس ورلڈ کپ میں شریک ٹیموں کو مجموعی طور پر 871 ملین ڈالر دیے جائیں گے، جو ماضی کے مقابلے میں زیادہ ہے۔

فیفا ورلڈ کپ 2026 11 جون سے 19 جولائی 2026 تک امریکا، کینیڈا اور میکسیکو میں کھیلا جائے گا۔