مرغی اور انڈوں کی قیمتوں میں بے قابو اضافہ، شہری شدید پریشان

شہر میں مرغی اور انڈوں کی قیمتوں میں مسلسل اضافہ دیکھنے میں آ رہا ہے جس کے باعث عام شہری کی مشکلات میں مزید اضافہ ہو گیا ہے۔ سستی پروٹین سمجھی جانے والی یہ بنیادی غذائی اشیاء بھی اب متوسط طبقے کی پہنچ سے دور ہوتی جا رہی ہیں۔

سرکاری نرخ مقرر ہونے کے باوجود اوپن مارکیٹ میں اشیائے خورونوش مہنگے داموں فروخت ہو رہی ہیں۔ اس صورتحال نے انتظامی کنٹرول اور حکومتی عملداری پر بھی سوالات کھڑے کر دیے ہیں۔

جاری کردہ اعداد و شمار کے مطابق برائلر مرغی کے گوشت کی سرکاری قیمت پانچ سو انیس روپے فی کلو مقرر ہے، تاہم مختلف علاقوں میں یہ پانچ سو چالیس سے پانچ سو پچاس روپے فی کلو تک فروخت ہو رہی ہے۔

اسی طرح فارمی انڈوں کی سرکاری قیمت دو سو پینتالیس روپے فی درجن ہے، لیکن مارکیٹ میں یہ دو سو پچپن روپے یا اس سے بھی زیادہ قیمت پر دستیاب ہیں۔

شہریوں کا کہنا ہے کہ مرغی اور انڈے روزمرہ خوراک کا لازمی حصہ ہیں، لیکن بڑھتی ہوئی مہنگائی نے ان بنیادی اشیاء کو بھی عام آدمی کی پہنچ سے دور کر دیا ہے۔ گھریلو بجٹ متاثر ہو رہا ہے اور خاص طور پر کم آمدنی والا طبقہ شدید مشکلات کا شکار ہے۔

عوام نے حکومت سے مطالبہ کیا ہے کہ سرکاری نرخوں پر سختی سے عملدرآمد یقینی بنایا جائے اور ناجائز منافع خوری میں ملوث عناصر کے خلاف مؤثر کارروائی کی جائے تاکہ قیمتوں کو کنٹرول کیا جا سکے۔