ایران کے سستے ہیٹ سیکنگ میزائل امریکی فضائیہ کے لیے ڈراؤنا خواب

ایران کے سستے اور سادہ حرارت تلاش کرنے والے (ہیٹ سیکنگ) میزائل امریکی فضائیہ کی جدید ترین ٹیکنالوجی کے لیے ایک بڑا خطرہ بن کر ابھرے ہیں۔

امریکی فضائیہ اس وقت ایک ایسے خطرے کا سامنا کر رہی ہے، جس کا توڑ اس کی مہنگی ترین ٹیکنالوجی کے پاس بھی نہیں ہے۔

ایران کے سستے اور سادہ حرارت تلاش کرنے والے (ہیٹ سیکنگ) میزائلوں نے امریکی فضائی برتری کو ہلا کر رکھ دیا ہے۔

یہ میزائل انجن کی تپش کو نشانہ بناتے ہیں اور ان سے کوئی ریڈار لہریں خارج نہیں ہوتیں، جس کی وجہ سے طیارے کے دفاعی نظام کو کوئی وارننگ نہیں ملتی۔

یہ بھی پڑھیں : ایران جنگ اور خشک سالی، امریکہ میں غذائی بحران کا خطرہ، گندم کی پیداوار میں تاریخی کمی

حالیہ آپریشن ‘ایپک فیوری’ کے دوران درجنوں امریکی طیارے اور ڈرونز ان میزائلوں کا شکار ہو چکے ہیں، جن میں دو ہفتے قبل تباہ ہونے والا ایف 15 ای اسٹرائیک ایگل بھی شامل ہے۔

ایران نے سوویت دور کی ٹیکنالوجی کو ریورس انجینئرنگ کے ذریعے جدید بنا کر ہزاروں کی تعداد میں یہ میزائل تیار کیے ہیں۔ یہ میزائل کندھے پر رکھ کر چلائے جا سکتے ہیں، جس کی وجہ سے انہیں کسی بھی جگہ چھپ کر فائر کرنا آسان ہوتا ہے۔

کم بلندی پر اڑنے والے طیارے، ہیلی کاپٹرز اور ڈرونز ان کا آسان شکار بنتے ہیں۔ ان میزائلوں کی ہلاکت خیزی کا اندازہ اس بات سے لگایا جا سکتا ہے کہ یہ طیارے کے بالکل قریب پہنچ کر پھٹ جاتے ہیں، جس سے طیارے کا بچنا ناممکن ہو جاتا ہے۔

اس صورتحال نے پینٹاگون کو اپنی فضائی حکمت عملی اور لو لیول ٹیکٹکس پر نظر ثانی کرنے پر مجبور کر دیا ہے، کیونکہ اربوں ڈالر کے طیارے چند ہزار ڈالر کے ایرانی میزائلوں کے سامنے بے بس نظر آ رہے ہیں۔