عالمی توانائی کا اصل بحران، خام تیل نہیں بلکہ تیل کی ریفائننگ میں کمی ہے

آبنائے ہرمز کے بحران کے باعث دنیا کی نظریں خام تیل کی سپلائی پر ہیں، لیکن ماہرین نے خبردار کیا ہے کہ اصل خطرہ پیٹرول، ڈیزل اور جیٹ فیول کی ریفائننگ میں ہونے والی شدید کمی ہے، جو عالمی معیشت کو مفلوج کر سکتی ہے۔

عالمی توانائی کی منڈی اس وقت ایک ایسی پیچیدگی کا شکار ہے، جس کی طرف بہت کم توجہ دی جا رہی ہے۔ اگرچہ آبنائے ہرمز میں خام تیل کی سپلائی میں رکاوٹیں خبروں کی زینت بنی ہوئی ہیں، لیکن اصل بحران ریفائنڈ مصنوعات یعنی ڈیزل، پیٹرول اور جیٹ فیول کی پیداوار میں کمی ہے۔

توانائی کے ماہرین کے مطابق بحران کے آغاز سے اب تک ساڑھے 45 کروڑ بیرل ریفائنڈ مصنوعات کی کمی واقع ہو چکی ہے۔

یہ بھی پڑھیں : آبنائے ہرمز کے بعد اب ملاکا کا محاذ، چین کے گرد امریکی گھیرا تنگ ہونے لگا

عالمی سطح پر ریفائنریوں کی پیداوار میں روزانہ 50 سے 60 لاکھ بیرل کی کٹوتی دیکھی جا رہی ہے، جس نے سپلائی چین کو بری طرح متاثر کیا ہے۔

خام تیل کے برعکس، جہاں اوپیک پلس ممالک کے پاس اضافی پیداواری صلاحیت موجود ہے، ریفائننگ کے شعبے میں ایسا کوئی بفر موجود نہیں ہے۔

عالمی ریفائنریاں پہلے ہی اپنی مکمل صلاحیت پر کام کر رہی تھیں۔ اب صورتحال یہ ہے کہ یورپ میں ڈیزل کے ذخائر پانچ سال کی کم ترین سطح پر ہیں اور جیٹ فیول کے ذخائر اتنے کم رہ گئے ہیں کہ صرف چند ہفتوں کی سپلائی باقی ہے۔

مئی اور جون میں مغربی ممالک میں پیٹرول کا شدید قحط پیدا ہونے کا خدشہ ہے کیونکہ ریفائنریاں اپنی پیداوار محدود کر رہی ہیں۔

اسٹراٹیجک ذخائر کا استعمال ایک عارضی حل تو ہو سکتا ہے لیکن یہ کھوئی ہوئی ریفائننگ صلاحیت کا نعم البدل نہیں ہے۔

ایشیائی ریفائنریاں اس وقت سب سے زیادہ دباؤ میں ہیں، اور اگر فوری اقدامات نہ کیے گئے تو نقل و حمل، صنعت اور عالمی توانائی کی سلامتی کو ناقابل تلافی نقصان پہنچ سکتا ہے۔