عالمی منڈی میں خام تیل کی قیمتوں میں پھر سے بڑا اضافہ

عالمی منڈی میں خام تیل کی قیمتوں میں اچانک اضافہ دیکھنے میں آیا ہے جس کی بڑی وجہ مشرق وسطیٰ میں بڑھتی ہوئی کشیدگی اور امریکہ کی ایران سے متعلق نئی سفارتی صورتحال کو قرار دیا جا رہا ہے۔

امریکی صدر ڈونلڈ ٹرمپ کی جانب سے ایران سے جڑی بعض اہم تجاویز مسترد ہونے کے بعد توانائی مارکیٹ میں بے یقینی کی کیفیت پیدا ہو گئی۔ اس صورتحال کے بعد عالمی آئل مارکیٹ میں ایک ہی دن کے اندر قیمتوں میں نمایاں اضافہ ریکارڈ کیا گیا۔

 برینٹ خام تیل کی قیمت میں تقریباً 3.8 فیصد اضافہ ہوا اور یہ 105.20 ڈالر فی بیرل تک پہنچ گئی۔ اسی طرح امریکی خام تیل ویسٹ ٹیکساس انٹرمیڈیٹ (WTI) بھی 4 فیصد اضافے کے ساتھ 99.30 ڈالر فی بیرل پر پہنچ گیا۔

توانائی کے شعبے سے وابستہ ماہرین کا کہنا ہے کہ خطے میں کشیدگی کے آغاز سے اب تک خام تیل کی قیمت میں مجموعی طور پر 20 ڈالر فی بیرل تک اضافہ ہو چکا ہے۔ اگر یہی صورتحال برقرار رہی تو آئندہ دنوں میں قیمتیں مزید بڑھ سکتی ہیں۔

معاشی تجزیہ کاروں نے خبردار کیا ہے کہ تیل کی قیمتوں میں یہ اضافہ دنیا بھر کی معیشتوں پر دباؤ ڈال سکتا ہے۔ خاص طور پر وہ ممالک جو تیل درآمد کرتے ہیں، ان میں مہنگائی بڑھنے کا امکان ہے۔ پاکستان سمیت کئی ترقی پذیر ممالک میں پیٹرولیم مصنوعات کی قیمتوں میں مزید اضافہ بھی متوقع قرار دیا جا رہا ہے۔