آئی فون صارفین کو بڑا جھٹکا؛ کمپنی کا اہم اعلان

ایپل کمپنی کے سی ای او ٹم کک نے اشارہ دیا ہے کہ آنے والے مہینوں میں آئی فون، میک اور آئی پیڈ سمیت مختلف مصنوعات کی قیمتوں میں اضافہ ہو سکتا ہے۔ پیداواری لاگت میں مسلسل اضافہ اب کمپنی کے لیے قیمتیں برقرار رکھنا مشکل بنا رہا ہے۔

ٹم کک نے ایک معروف امریکی اخبار کو انٹرویو دیتے ہوئے کہا کہ موبائل اور کمپیوٹرز میں استعمال ہونے والی میموری اور اسٹوریج چپس کی قیمتوں میں تیزی سے اضافہ ہوا ہے۔ یہی وجہ ہے کہ پرانی قیمتوں پر مصنوعات کی فروخت جاری رکھنا ممکن نہیں رہا۔ یہ چپس اسمارٹ فونز، ٹیبلیٹس اور لیپ ٹاپس کا بنیادی حصہ ہیں۔

انہوں نے کہا کہ دنیا بھر میں اے آئی ٹیکنالوجی کے بڑھتے ہوئے استعمال کے باعث طاقتور چپس کی مانگ بہت زیادہ بڑھ گئی ہے۔ بڑی ٹیک کمپنیاں جدید سسٹمز کے لیے زیادہ چپس خرید رہی ہیں، جس کی وجہ سے عام موبائل اور کمپیوٹرز کے لیے سپلائی کم ہو گئی ہے۔

ٹم کک کے مطابق چپ بنانے والی کمپنیاں زیادہ تر اپنی پیداوار بڑے اداروں کو فراہم کر رہی ہیں، جس سے عام صارفین کے لیے لاگت بڑھ رہی ہے۔ موجودہ حالات میں کمپنی پر دباؤ ہے کہ وہ قیمتوں میں اضافہ کرے۔

اگرچہ ایپل نے ابھی واضح طور پر یہ نہیں بتایا کہ کن مصنوعات کی قیمت پہلے بڑھے گی، لیکن رپورٹس کے مطابق میک کمپیوٹرز اور آئی پیڈ سب سے پہلے متاثر ہو سکتے ہیں۔ حال ہی میں میک منی کی قیمت میں اضافہ بھی اسی پالیسی کا اشارہ سمجھا جا رہا ہے۔

رپورٹس میں یہ بھی بتایا جا رہا ہے کہ آنے والے آئی فون 18 سیریز میں ممکنہ طور پر قیمتیں مزید بڑھ سکتی ہیں۔ اس سیریز میں کمپنی اپنا پہلا فولڈ ایبل آئی فون بھی متعارف کروا سکتی ہے۔ اندازہ ہے کہ آئی فون پرو ماڈلز کی قیمت میں تقریباً 270 ڈالر تک اضافہ ہو سکتا ہے۔