جنوبی افریقا نے جنوبی کوریا کو ہرا کر پہلی بار ورلڈ کپ کے ناک آؤٹ مرحلے میں جگہ بنا لی

جنوبی افریقا نے جنوبی كوریا کو 1-0 سے ہرا کر تاریخ میں پہلی بار ورلڈ کپ کے ناک آؤٹ مرحلے میں جگہ بنا لی، جو پہلے میچ میں عبرت ناک شکست کے بعد ایک شاندار واپسی ہے۔

سن 2010 میں ورلڈ کپ کی میزبانی کرنے کے بعد پہلی بار اس ٹورنامنٹ میں شریک ہونے والی جنوبی افریقا کی ٹیم کو میکسیکو کے خلاف 2-0 سے ہارنے کے بعد ناکام تصور کیا جا رہا تھا۔

تاہم اس ٹیم نے چیک جمہوریہ کے خلاف میچ ڈرا کیا اور پھر مانیٹری میں کھیلے گئے اہم میچ میں جنوبی کوریا کو شکست دے کر گروپ میں دوسری پوزیشن حاصل کر لی۔

جنوبی کوریا کے کوچ میانگ بو ہونگ نے میچ کے آغاز میں اپنے کپتان سون ہیونگ من کو باہر بٹھا کر سب کو حیران کر دیا۔

میچ کے شروع میں جنوبی کوریا نے جارحانہ کھیل پیش کیا اور ان کے قائم مقام کپتان کم من جے کا ایک بہترین ہیڈر جنوبی افریقا کے کھلاڑی اوبری موڈیبا نے گول لائن پر روک لیا۔

یہ بھی پڑھیں : فٹبال ورلڈ کپ، مراکش نے ہیٹی کو سنسنی خیز مقابلے کے بعد 4-2 سے ہرا دیا

جنوبی افریقا نے جلد ہی میچ پر گرفت مضبوط کی اور بہترین کھیل کا مظاہرہ کیا، لیکن وہ گول کرنے کے کئی مواقع ضائع کر بیٹھے۔

میچ کے 30 ویں منٹ میں ایویڈنس ماکگوپا کے پاس گول کرنے کا سنہری موقع تھا، لیکن انہوں نے گیند سیدھی کورین گول کیپر کے ہاتھوں میں مار دی۔

دوسرے ہاف کے آغاز میں جنوبی کوریا کے کپتان سون ہیونگ من کو میدان میں اتارا گیا اور دونوں ٹیموں نے کھیل میں تیزی دکھائی۔

میچ کا فیصلہ کن لمحہ 63 ویں منٹ میں آیا، جب شیپانگ موریمی کے کراس پر تھاپیلو ماسیکو نے انتہائی مہارت سے گیند کو نیٹ میں پہنچا کر جنوبی افریقا کو 1-0 کی برتری دلا دی۔

جنوبی کوریا نے آخری منٹوں میں واپسی کی بہت کوشش کی لیکن وہ ناکام رہے اور اب جنوبی افریقا 28 جون کو لاس اینجلس میں کینیڈا کے خلاف ناک آؤٹ میچ کھیلے گا۔