آئی فون کی قیمت میں اضافے کا امکان

دنیا کی مانی ہوئی ٹیکنالوجی کمپنی ایپل نے اپنے آئی پیڈ، میک بک اور کئی دوسری بڑی مصنوعات کی قیمتیں یکدم بڑھا دی ہیں۔

 اس اچانک اضافے کے بعد اب مارکیٹ میں ایپل کی چیزیں خریدنا مشکل ہو گیا ہے۔ ماہرینِ ٹیکنالوجی نے یہ خطرہ بھی ظاہر کیا ہے کہ آنے والے دنوں میں ایپل کے نئے آئی فون ماڈلز کی قیمتوں میں بھی بڑا اضافہ دیکھنے کو مل سکتا ہے۔

کمپنی کا کہنا ہے کہ دنیا بھر میں آرٹیفیشل انٹیلیجنس یعنی اے آئی (AI) کا استعمال بہت زیادہ بڑھ رہا ہے۔ اس تیزی سے بڑھتی ہوئی مانگ کی وجہ سے کمپیوٹر چپس، میموری اور اسٹوریج چپس بنانے والی کمپنیوں نے اپنی قیمتیں بہت زیادہ بڑھا دی ہیں۔ چونکہ اب ایپل کو یہ پرزے مہنگے مل رہے ہیں، اس لیے ان کے لیے اپنی مصنوعات کی قیمتیں بڑھانا مجبوری بن گیا تھا۔

ایپل کی طرف سے جاری نئی لسٹ کے مطابق "میک بک نیو” (MacBook Neo) کی قیمت 599 ڈالر سے بڑھا کر اب 699 ڈالر کر دی گئی ہے۔ اسی طرح، 512 جی بی اسٹوریج والی "میک بک ائیر” (MacBook Air) کی قیمت میں پورا 200 ڈالر کا اضافہ کیا گیا ہے۔ جو گاہک زیادہ اسٹوریج والا یعنی ایک ٹیرا بائٹ (1TB) کا "میک بک پرو” (MacBook Pro) خریدنا چاہتے ہیں، انہیں اب پرانی قیمت سے 300 ڈالر زیادہ ادا کرنے ہوں گے۔

کمپنی نے صرف لیپ ٹاپ ہی مہنگے نہیں کیے بلکہ گھروں میں استعمال ہونے والی دوسری چیزیں بھی مہنگی کر دی ہیں۔ اب ایپل کا مشہور اسمارٹ اسپیکر "ہوم پوڈ” (HomePod) بھی پہلے سے زیادہ قیمت پر ملے گا۔ اس کے ساتھ ساتھ "ایپل ٹی وی” (Apple TV) کے دونوں دستیاب ماڈلز کی قیمتوں میں بھی اضافہ کر دیا گیا ہے۔

موجودہ وقت میں ایپل نے اپنے آئی فونز کی قیمتوں کو ہاتھ نہیں لگایا اور وہ پرانے ریٹ پر ہی مل رہے ہیں۔ لیکن مارکیٹ کے تجزیہ کاروں کا دعویٰ ہے کہ یہ ریلیف عارضی ہے۔ ایپل کے اگلے نئے آئی فون ماڈلز مارکیٹ میں آتے ہی قیمتوں کا ایک نیا طوفان آ سکتا ہے۔

ماہرین کا کہنا ہے کہ کمپنی نے جان بوجھ کر آئی فون کی قیمتیں ابھی نہیں بڑھائیں تاکہ جب نیا آئی فون لانچ ہو تو لوگوں کا دھیان صرف نئے فون کے فیچرز پر رہے، نہ کہ اس کی مہنگی قیمت پر۔

ٹیکنالوجی کے ماہرین نے وضاحت کی ہے کہ ان چپس کی قیمتیں بڑھنے کے پیچھے "این ویڈیا” (Nvidia) جیسی بڑی کمپنیوں کا ہاتھ ہے۔ یہ کمپنیاں اے آئی ڈیٹا سینٹرز کے لیے میموری چپس کے بہت بڑے اور طویل مدتی آرڈرز بک کر رہی ہیں۔ اس وجہ سے عام مارکیٹ کے لیے چپس کی سپلائی کم پڑ گئی ہے اور ریٹ اوپر چلے گئے ہیں۔