صومالیہ میں اقوامِ متحدہ کے نام پر اسرائیلی فوجی سامان کی ترسیل کا انکشاف

ذرائع نے انکشاف کیا ہے کہ اسرائیل کی جانب سے صومالیہ کے لیے بھیجی گئی ایک فوجی اور انٹیلی جنس کھیپ کو اقوامِ متحدہ کے نام پر مقبوضہ فلسطین سے روانہ کیا گیا تھا۔

اسٹریٹجک ذرائع کا کہنا ہے کہ اسرائیل کی ایک فوجی کھیپ اقوامِ متحدہ کے نام کا سہارا لے کر صومالیہ بھیجی گئی ہے۔ ان ذرائع نے بتایا کہ ہزار کلوگرام وزنی یہ سامان تل ابیب سے نیروبی کے راستے موغادیشو پہنچایا گیا، جو 21 جون کو وہاں اترا اور اسے اقوامِ متحدہ کے ایک دفتر کے سامان کے طور پر رجسٹرڈ کیا گیا تھا۔

ذرائع نے مزید تصدیق کی کہ اس کارگو کے اندر جدید ترین مواصلاتی نظام موجود تھا، جو خالصتاً فوجی اور انٹیلی جنس مقاصد کے لیے استعمال ہوتا ہے۔

یہ حساس سامان مقبوضہ فلسطین کے علاقے اور یہودا میں قائم ایک اسرائیلی سیکیورٹی کمپنی کی طرف سے فراہم کیا گیا تھا، جسے موغادیشو میں اقوامِ متحدہ کے ایک دفتر نے ہی وصول کیا ہے۔

یہ بھی پڑھیں : اسرائیلی پارلیمنٹ میں مساجد کے لاؤڈ اسپیکر اور اذان پر پابندی کا متنازع بل پیش

اس سنگین معاملے پر انصار اللہ کے سربراہ سید عبدالملک الحوثی نے 25 جون کو اپنے ایک خطاب میں سخت وارننگ دیتے ہوئے کہا ہے کہ ان کی تحریک صومالیہ کی سرزمین پر اسرائیلی سرگرمیوں کو ناکام بنانے کے لیے کسی بھی وقت کارروائی کر سکتی ہے اور وہ افریقہ کے اس اہم ترین خطے میں اسرائیل کے پھیلاؤ کو دیکھ کر خاموش نہیں بیٹھیں گے۔

انصار اللہ کے سربراہ نے خاص طور پر صومالیہ کی صورتحال کا ذکر کرتے ہوئے خبردار کیا کہ اسرائیل وہاں اپنے پاؤں جما کر اسٹریٹجک لحاظ سے اہم خلیجِ عدن اور باب المندب کے سمندری راستے پر کنٹرول حاصل کرنا چاہتا ہے، جہاں سے دنیا بھر کی تجارتی بحری جہاز گزرتے ہیں۔

انہوں نے بحیرہ احمر کے کنارے واقع تمام ممالک پر زور دیا کہ وہ خطے میں اسرائیلی سرگرمیوں کے خلاف ایک متحدہ مؤقف اپنائیں کیونکہ یہ صومالیہ کی خود مختاری کی کھلی خلاف ورزی اور پورے خطے کے امن کے لیے ایک بڑا خطرہ ہے۔