سپریم لیڈر خامنہ ای کی آخری رسومات کیلئے ایران کو ایک ہفتے کی چھٹی دی کیونکہ ہم بااخلاق ہیں، ٹرمپ

امریکی صدر ڈونلڈ ٹرمپ نے دعویٰ کیا ہے کہ ایران امریکا کے ساتھ معاہدہ کرنا چاہتا ہے اور واشنگٹن نے ایران کے سابق سپریم لیڈر آیت اللہ علی خامنہ ای کی آخری رسومات کے باعث مذاکرات میں ایک ہفتے کا وقفہ دیا ہے۔

اناطولیہ ایجنسی کے مطابق ٹرمپ نے یہ بات ساؤتھ ڈکوٹا میں ماؤنٹ رشمور پر امریکا کی آزادی کے 250 سال مکمل ہونے کی تقریبات سے خطاب کرتے ہوئے کہی۔

انہوں نے کہا کہ حالیہ کشیدگی کے باوجود ایران معاہدے کے لیے بے تاب ہے اور امریکا نے جنازے کے باعث اسے ایک ہفتے کی مہلت دی۔

ٹرمپ نے اپنی تقریر میں امریکا کی فوجی، سیاسی اور تاریخی طاقت کا بھی ذکر کیا۔

ان کا کہنا تھا کہ امریکا نے دنیا کی سب سے طاقتور فوج تشکیل دی، دو عالمی جنگیں جیتیں اور دنیا میں آزادی، جمہوریت اور فلاحی کاموں میں اہم کردار ادا کیا۔

ایران کے حوالے سے گفتگو کرتے ہوئے ٹرمپ نے ایک بار پھر عندیہ دیا کہ تہران کے ساتھ مذاکرات کا راستہ مکمل طور پر بند نہیں ہوا اور امریکا اب بھی کسی ممکنہ معاہدے کے امکانات کو دیکھ رہا ہے۔

اپنی تقریر کے دوران انہوں نے امریکا کی تاریخ اور آئینی نظام کو بھی سراہا اور کہا کہ امریکا دنیا کی سب سے آزاد قوم اور سب سے مضبوط جمہوری ریاست ہے۔

داخلی سیاست پر بات کرتے ہوئے ٹرمپ نے خبردار کیا کہ امریکا میں کمیونزم کا خطرہ دوبارہ سر اٹھا رہا ہے، جسے انہوں نے امریکی آزادی اور قومی شناخت کے لیے بڑا خطرہ قرار دیا۔ انہوں نے کہا کہ امریکا کبھی کمیونسٹ ریاست نہیں بنے گا اور آئندہ انتخابات میں اپنی جماعت کی کامیابی کے لیے پرعزم ہیں۔