یہ میرا آخری ورلڈ کپ نہیں، کرسٹیانو رونالڈو کا ریٹائرمنٹ سے انکار

پرتگال کے لیجنڈری فٹبالر کرسٹیانو رونالڈو نے اسپین کے خلاف ہائی وولٹیج ناک آؤٹ میچ سے قبل ایک بار پھر یہ تسلیم کرنے سے انکار کر دیا ہے کہ یہ ان کے کیریئر کا آخری ورلڈ کپ ہے۔

پرتگال اور اسپین کے درمیان راؤنڈ آف 16 کے بڑے مقابلے سے قبل پریس کانفرنس کرتے ہوئے کرسٹیانو رونالڈو نے واضح کیا کہ وہ بغیر کسی پچھتاوے کے فٹبال چھوڑیں گے۔

ریکارڈ چھٹا ورلڈ کپ کھیلنے والے رونالڈو سے جب صحافیوں نے بار بار پوچھا کہ کیا یہ ان کا آخری ورلڈ کپ ہے، تو انہوں نے کہا کہ میں تبھی الوداع کہوں گا، جب میرا اپنا فیصلہ ہوگا۔ آپ لوگ ہمیشہ ایک ہی سوال پوچھتے ہیں، فی الحال سب سے اہم بات یہ ہے کہ ہم کل کے میچ میں اچھا کھیل پیش کریں۔

رونالڈو نے انتہائی ایمانداری سے بات کرتے ہوئے کہا کہ کل کے میچ کا نتیجہ جو بھی ہو، میرا ضمیر ایک ہزار فیصد مطمئن رہے گا، کیونکہ میں نے فٹبال کو اپنا سب کچھ دیا ہے۔

یہ بھی پڑھیں : برازیل کے اسٹار فٹبالر نیمار نے بین الاقوامی فٹبال سے ریٹائرمنٹ کا اعلان کر دیا

انہوں نے کہا کہ میں کسی مجبوری میں نہیں بلکہ فٹبال کے لیے اپنے جنون کی وجہ سے اتنے سالوں سے کھیل رہا ہوں، میری زندگی بہت اچھی گزر رہی ہے۔

ان کا کہنا تھا کہ قومی ٹیم کے لیے کھیلنا میرا اعزاز ہے اور مجھے اس پر کوئی دباؤ محسوس نہیں ہوتا کہ مجھے ہر صورت میں جیتنا ہی ہے۔ عالمی کپ جیسے بڑے ایونٹ میں ہر میچ کا لطف اٹھانا چاہیے، میں نے اب تک ٹورنامنٹ میں 3 گول کیے ہیں جو کہ برے نہیں ہیں۔

رونالڈو نے موجودہ ٹورنامنٹ کے بارے میں بات کرتے ہوئے کہا کہ وہ اپنے پچھلے 5 ورلڈ کپ کے مقابلے میں اس بار زیادہ لطف اندوز ہو رہے ہیں۔ انہیں یقین ہے کہ رابرٹو مارٹنیز کی نگرانی میں پرتگال کی ٹیم اسپین کو شکست دینے کی صلاحیت رکھتی ہے۔

اسپین کے خلاف میچ رونالڈو کا پرتگال کے لیے 233 واں میچ ہوگا۔ اسپین کے خلاف ان کا ریکارڈ متوازن رہا ہے، جہاں انہوں نے 10 یا 11 میچوں میں 4 گول اسکور کیے ہیں، جن میں 2018 کے ورلڈ کپ میں بنائی گئی شاندار ہیٹ ٹرک بھی شامل ہے۔