فیفا کا امریکی صدر ڈونلڈ ٹرمپ کی تنقید کے بعد ریفری رافیل کلاؤس کی بھرپور حمایت

فیفا نے امریکی صدر ڈونلڈ ٹرمپ کی جانب سے ریفری پر تنقید کے بعد برازیلی ریفری رافیل کلاؤس کی مکمل حمایت کا اعلان کرتے ہوئے ان کی پیشہ ورانہ دیانت داری کی تعریف کی ہے۔

بین الاقوامی فٹ بال فیڈریشن (فیفا) نے برازیل سے تعلق رکھنے والے ریفری رافیل کلاؤس کی مکمل حمایت کی ہے، جن کی دیانت داری پر امریکی صدر ڈونلڈ ٹرمپ نے سوالات اٹھائے تھے۔

یہ تنازع اس وقت شروع ہوا، جب ریفری کلاؤس نے امریکہ کے اسٹرائیکر فولارین بالوگون کو بوسنیا اور ہرزیگووینا کے خلاف میچ میں مخالف کھلاڑی پر بوٹ مارنے کی وجہ سے ریڈ کارڈ دکھا کر میدان سے باہر بھیج دیا تھا۔

یہ بھی پڑھیں : 6 مختلف ورلڈ کپ میں گول کرنے والے دنیا کے پہلے کھلاڑی کرسٹیانو رونالڈو الوداع کہہ گئے

اگرچہ فیفا نے بعد میں بالوگون پر لگی پابندی معطل کر دی تھی، تاہم صدر ٹرمپ نے کہا کہ انہوں نے اس فیصلے پر نظرثانی کا مطالبہ کیا تھا اور ریفری کلاؤس کے ماضی کو مشکوک قرار دیا تھا۔

فیفا نے اپنے بیان میں کہا ہے کہ رافیل کلاؤس دنیا کے بہترین پیشہ ور ریفریز میں سے ایک ہیں اور وہ فیفا کے سب سے ایلیٹ گروپ کا حصہ ہیں۔

فیفا کے صدر جیانی انفینٹینو نے کہا کہ ریفریز اور کھیل کے قوانین کا احترام ہر صورت لازم ہے کیونکہ ریفری کے بغیر فٹ بال ممکن نہیں ہے۔

فیفا کے چیف ریفری پیئرلوئیگی کولینا نے بھی 46 سالہ کلاؤس پر مکمل اعتماد کا اظہار کیا، جو اپنے کیریئر میں 600 سے زائد میچوں میں ریفرینگ کر چکے ہیں اور یہ ان کا دوسرا ورلڈ کپ ہے۔

واضح رہے کہ ریڈ کارڈ کا تنازع حل ہونے کے بعد بالوگون کو بیلجیم کے خلاف میچ میں کوچ موریشیو پوچیتینو نے ٹیم کا حصہ بنایا تھا۔