اربعین حسینیؑ: مشرقِ وسطیٰ میں جنگی صورتحال کے باوجود کربلا میں دنیا بھر سے تقریباً 2 کروڑ زائرین کی آمد

کربلا: مشرقِ وسطیٰ میں جاری کشیدہ سیکیورٹی صورتحال اور جنگی خدشات کے باوجود اربعینِ امام حسینؑ کے موقع پر دنیا بھر سے کروڑوں عاشقانِ اہلِ بیتؑ نے کربلا کا رخ کیا۔ حرمِ حضرت اباالفضل العباسؑ کی انتظامیہ کی جانب سے جاری کیے گئے اعداد و شمار کے مطابق 20 صفر کی شام 6 بجے تک کربلا میں داخل ہونے والے زائرین کی تعداد تقریباً 2 کروڑ (20 ملین) تک پہنچ گئی۔

حرمِ حضرت اباالفضل العباسؑ کی انتظامیہ کے مطابق زائرین کی گنتی شہر کے تمام مرکزی داخلی راستوں پر نصب جدید الیکٹرانک اور مصنوعی ذہانت (AI) پر مبنی نظام کے ذریعے کی گئی، جس کا مقصد زائرین کی درست اور شفاف تعداد کا تعین کرنا ہے۔ انتظامیہ کا کہنا ہے کہ یہ نظام گزشتہ چند برسوں سے اربعین کے دوران استعمال کیا جا رہا ہے اور اس کی بدولت اعداد و شمار کی درستگی میں نمایاں بہتری آئی ہے۔

عراقی حکام کے مطابق رواں سال نجف سے کربلا تک پیدل سفر کرنے والے لاکھوں زائرین کے علاوہ ایران، پاکستان، لبنان، بحرین، ہندوستان، افغانستان، آذربائیجان، خلیجی ممالک، یورپ، افریقہ اور دنیا کے دیگر خطوں سے بھی بڑی تعداد میں عقیدت مند کربلا پہنچے۔ بیرونِ ملک سے آنے والے زائرین کی تعداد بھی لاکھوں میں رہی، جبکہ عراق کے مختلف شہروں سے کروڑوں افراد نے اس عظیم مذہبی اجتماع میں شرکت کی۔

بین الاقوامی خبر رساں اداروں کے مطابق رواں سال اربعین ایسے وقت میں منعقد ہوا جب پورا مشرقِ وسطیٰ سیکیورٹی خدشات اور علاقائی کشیدگی کا سامنا کر رہا ہے۔ اس کے باوجود زائرین کی بڑی تعداد نے حضرت امام حسینؑ اور حضرت اباالفضل العباسؑ کے روضوں پر حاضری دے کر اپنی عقیدت کا اظہار کیا۔ بعض ممالک سے آنے والے زائرین کی تعداد معمول سے کم دیکھی گئی، تاہم مجموعی طور پر یہ اجتماع بدستور دنیا کے سب سے بڑے سالانہ مذہبی اجتماعات میں شمار کیا جا رہا ہے۔

حرمینِ مقدسین کی انتظامیہ اور عراقی حکومت کی جانب سے زائرین کی سہولت کے لیے غیر معمولی انتظامات کیے گئے۔ ہزاروں رضاکار، مواکب، طبی مراکز، ایمبولینس سروسز اور سیکیورٹی اہلکار چوبیس گھنٹے خدمات انجام دیتے رہے، جبکہ زائرین کو راستے بھر میں مفت کھانا، پانی، رہائش اور طبی امداد بھی فراہم کی گئی۔

واضح رہے کہ اربعینِ حسینیؑ ہر سال 20 صفر کو حضرت امام حسینؑ، ان کے اہلِ بیتؑ اور وفادار اصحاب کی شہادت کے چالیسویں دن منایا جاتا ہے۔ یہ اجتماع صرف ایک مذہبی تقریب نہیں بلکہ حق، عدل، ایثار، آزادی اور ظلم کے خلاف مزاحمت کی عالمی علامت سمجھا جاتا ہے، جہاں مختلف ممالک، زبانوں اور ثقافتوں سے تعلق رکھنے والے لاکھوں افراد “لبیک یا حسینؑ” کی صدا کے ساتھ شریک ہوتے ہیں۔