ونڈوز صارفین ہوشیار! گوگل پاس کیز کے ذریعے اکاؤنٹس ہیک ہونے کا نیا خطرہ سامنے آگیا

کراچی: سائبر سیکیورٹی ماہرین نے ونڈوز صارفین کے لیے ایک اہم انتباہ جاری کرتے ہوئے انکشاف کیا ہے کہ اگر کمپیوٹر پہلے سے میلویئر کا شکار ہو تو گوگل کروم کے Google Password Manager میں محفوظ Passkeys کو نشانہ بنا کر صارفین کے مختلف آن لائن اکاؤنٹس تک غیر مجاز رسائی حاصل کی جا سکتی ہے۔

تحقیق کے مطابق حملہ آور گوگل پاس ورڈ مینیجر میں موجود بعض کمزوریوں سے فائدہ اٹھاتے ہوئے صارف کی تصدیق کے عمل کو نظرانداز کر سکتے ہیں، اپنے کنٹرول میں موجود نئی پاس کی اکاؤنٹ میں شامل کر سکتے ہیں یا پھر وہ خفیہ معلومات حاصل کر سکتے ہیں جن کے ذریعے سنک ہونے والی پاس کیز محفوظ رکھی جاتی ہیں۔

ماہرین کا کہنا ہے کہ بعض صورتوں میں حملہ آور ایک بار رسائی حاصل کرنے کے بعد کسی دوسرے کمپیوٹر سے بھی متاثرہ اکاؤنٹ میں دوبارہ لاگ اِن کر سکتا ہے، جس سے ای میل، کلاؤڈ اسٹوریج، سوشل میڈیا اور دیگر حساس اکاؤنٹس خطرے میں آ سکتے ہیں۔

سائبر سیکیورٹی ماہرین کے مطابق یہ حملہ صرف اس صورت میں ممکن ہے جب صارف کا ونڈوز سسٹم پہلے ہی کسی خطرناک میلویئر سے متاثر ہو۔ اگر کمپیوٹر محفوظ ہو اور اس میں میلویئر موجود نہ ہو تو اس خطرے کے امکانات انتہائی کم ہو جاتے ہیں۔

ماہرین نے صارفین کو مشورہ دیا ہے کہ وہ اپنے ونڈوز سسٹم اور گوگل کروم کو ہمیشہ تازہ ترین اپ ڈیٹس کے ساتھ استعمال کریں، غیر معروف ویب سائٹس سے سافٹ ویئر ڈاؤن لوڈ کرنے سے گریز کریں، مستند اینٹی وائرس یا اینڈ پوائنٹ پروٹیکشن استعمال کریں اور اپنے کمپیوٹر کا باقاعدگی سے سیکیورٹی اسکین کرتے رہیں تاکہ کسی بھی ممکنہ میلویئر کا بروقت پتہ چل سکے۔