آبنائے ہرمز میں عارضی راستے کے معاہدے پر عمان کے ساتھ پیشرفت آخری مراحل میں ہے،عباس عراقچی

ایرانی وزیر خارجہ عباس عراقچی کا کہنا ہے کہ آبنائے ہرمز میں عارضی راستے کے معاہدے پر عمان کے ساتھ پیشرفت آخری مراحل میں ہے۔

 ایرانی وزیر خارجہ عباس عراقچی کا اپنے بیان میں کہنا ہے کہ عمان کے ساتھ ایک عارضی بحری راستے سے متعلق مذاکرات جاری ہیں،نتیجے کے بہت قریب ہیں، عارضی راستے کے تعین کا لازمی یہ مطلب نہیں کہ آبنائے ہرمز دوبارہ کھول دی جائے۔

انہوں نے کہا کہ آبنائے ہرمز کھولنے کا انحصار دیگر عوامل پر ہے، امریکا کی جانب سے مفاہمتی یادداشت کی خلاف ورزیوں کا ازالہ کیا جانا چاہیے۔

وزیر خارجہ عباس عراقچی کا کہنا ہے کہ موجودہ صورتحال امریکا کی جانب سے مفاہمتی یادداشت کی خلاف ورزی کا نتیجہ ہے، دونوں ممالک کی بحری افواج کے درمیان مذاکرات ہوچکے،اب حتمی شکل دی جارہی ہے۔