پاکستانیوں کیلئے بیرونِ ملک نوکریوں کے سنہری مواقع، یونسکو میں ملازمت کیلئے درخواست دینے کا طریقہ

اسلام آباد: پاکستانی شہریوں کے لیے عالمی سطح پر ملازمت اور بین الاقوامی کیریئر کے مواقع سامنے آگئے ہیں، بیورو آف امیگریشن اینڈ اوورسیز ایمپلائمنٹ نے یونسکو میں مختلف عہدوں پر بھرتیوں سے متعلق تفصیلات جاری کردی ہیں۔

بیورو آف امیگریشن اینڈ اوورسیز ایمپلائمنٹ کے مطابق اقوام متحدہ کے ذیلی ادارے یونسکو میں پاکستانی شہریوں سمیت اہل امیدواروں کے لیے مختلف عالمی سطح کی ملازمتوں کے مواقع موجود ہیں۔

ان مواقع کا مقصد مختلف شعبوں میں مہارت رکھنے والے افراد کو بین الاقوامی ادارے میں کام کرنے اور عالمی سطح پر اپنے کیریئر کو آگے بڑھانے کا موقع فراہم کرنا ہے۔

یونسکو میں کن عہدوں پر مواقع موجود ہیں؟

یونسکو کی جانب سے P-1 سے P-5 تک مختلف پیشہ ورانہ عہدوں کے علاوہ D-1 اور D-2 سطح کے ڈائریکٹر عہدوں پر بھی مواقع پیش کیے جاتے ہیں۔

تعلیم، سائنس، ثقافت، انتظامیہ، فنانس، انجینئرنگ اور دیگر سماجی و انتظامی شعبوں سے تعلق رکھنے والے امیدوار اپنی قابلیت اور تجربے کے مطابق ان مواقع کے لیے درخواست دے سکتے ہیں۔

امیدواروں کے لیے کیا اہلیت ضروری ہے؟

درخواست دینے والے امیدوار کے پاس متعلقہ شعبے میں یونیورسٹی کی ڈگری، پیشہ ورانہ قابلیت اور عملی تجربہ ہونا ضروری ہے۔

اس کے علاوہ اچھی مواصلاتی صلاحیتوں کو اہمیت دی جاتی ہے جبکہ انگریزی اور فرانسیسی زبان پر عبور رکھنے والے امیدواروں کو ترجیح دی جاسکتی ہے۔

تاہم ہر اسامی کے لیے اہلیت اور تجربے کی شرائط مختلف ہوسکتی ہیں، اس لیے امیدواروں کو درخواست دینے سے پہلے متعلقہ آسامی کی مکمل تفصیلات ضرور پڑھنے کی ہدایت کی گئی ہے۔

منتخب امیدواروں کو کیا مراعات ملیں گی؟

یونسکو میں منتخب ہونے والے امیدواروں کو عالمی سطح کے منصوبوں پر کام کرنے اور بین الاقوامی ماحول میں پیشہ ورانہ تجربہ حاصل کرنے کا موقع ملے گا۔

ملازمت کی نوعیت اور عہدے کے مطابق بنیادی تنخواہ کے علاوہ فیملی الاؤنس، بچوں کی تعلیم کے لیے مالی معاونت، سفری سہولیات اور دیگر مراعات بھی یونسکو کے قواعد و ضوابط کے تحت فراہم کی جاسکتی ہیں۔

پاکستانی امیدوار درخواست کیسے دیں؟

خواہش مند امیدوار یونسکو کے آفیشل آن لائن کیریئر پورٹل کے ذریعے دستیاب آسامیوں کی تفصیلات دیکھ کر درخواست جمع کراسکتے ہیں۔

یونسکو کا آفیشل کیریئر پورٹل

درخواست کے دوران امیدواروں کو اپنی تعلیمی اسناد، پیشہ ورانہ تجربے اور دیگر مطلوبہ معلومات فراہم کرنا ہوں گی۔ بعض عہدوں کے لیے امیدواروں کو تکنیکی جانچ، تحریری امتحان یا انٹرویو کے مراحل سے بھی گزرنا پڑسکتا ہے۔

بیورو آف امیگریشن نے امیدواروں کو مشورہ دیا ہے کہ وہ کسی غیر رسمی ایجنٹ یا تھرڈ پارٹی پورٹل پر اعتماد نہ کریں اور ملازمت کی تفصیلات کی تصدیق براہِ راست یونسکو کی آفیشل ویب سائٹ سے کریں۔

امیدواروں کو چاہیے کہ درخواست کی آخری تاریخ سے قبل اپنا سی وی اور کور لیٹر سمیت تمام مطلوبہ دستاویزات مکمل کرکے آن لائن جمع کرائیں۔