واٹس ایپ میں صارفین کیلئے زبردست نیا فیچر متعارف

واٹس ایپ نے اینڈرائیڈ صارفین کے لیے ایک نئے فیچر کی آزمائش شروع کردی ہے، جس کے ذریعے چیٹ کھولے بغیر تصاویر، ویڈیوز اور اسٹیکرز کا پریویو دیکھنا ممکن ہوگا۔

رپورٹ کے مطابق یہ فیچر فی الحال واٹس ایپ کے بیٹا ورژن میں متعارف کرایا گیا ہے۔ اس کا مقصد صارفین کے لیے چیٹس میں موصول ہونے والے میڈیا کو دیکھنے کے عمل کو مزید آسان بنانا ہے۔

ابھی واٹس ایپ کی ہوم فیڈ پر کسی چیٹ میں موصول ہونے والے پیغام کے الفاظ تو دکھائی دیتے ہیں، تاہم اگر کسی نے تصویر، ویڈیو یا اسٹیکر بھیجا ہو تو اسے دیکھنے کے لیے متعلقہ چیٹ کھولنا پڑتی ہے۔

نئے فیچر کے تحت واٹس ایپ میڈیا لیبل کے ساتھ ایک چھوٹا تھمب نیل بھی دکھائے گا۔ مثال کے طور پر اگر کسی کانٹیکٹ نے تصویر بھیجی ہے تو ہوم فیڈ پر ’فوٹو‘ کے ساتھ اس تصویر کا چھوٹا سا پریویو بھی نظر آئے گا۔

اسی طرح ویڈیو اور اسٹیکر موصول ہونے کی صورت میں بھی ان کا مختصر پریویو ہوم فیڈ پر دکھایا جائے گا، جس سے صارف کو چیٹ کھولنے سے پہلے ہی اندازہ ہوجائے گا کہ اسے کیا میڈیا موصول ہوا ہے۔

یہ فیچر خاص طور پر ان صارفین کے لیے مفید ثابت ہوسکتا ہے جنہیں روزانہ مختلف کانٹیکٹس اور گروپس سے بڑی تعداد میں تصاویر، ویڈیوز اور اسٹیکرز موصول ہوتے ہیں۔ اس کے ذریعے غیر ضروری طور پر متعدد چیٹس کھولنے کی ضرورت کم ہوسکتی ہے۔

تاہم یہ فیچر ابھی آزمائشی مرحلے میں ہے اور بیٹا صارفین کے لیے دستیاب کیا گیا ہے۔ واٹس ایپ کی جانب سے فی الحال یہ واضح نہیں کیا گیا کہ اسے تمام اینڈرائیڈ صارفین کے لیے کب جاری کیا جائے گا۔