یو اے ای میں ملازمت اور رہائشی ویزوں کی منسوخی کی خبروں کی حقیقت سامنے آگئی

متحدہ عرب امارات میں غیر ملکیوں کے ملازمت اور رہائشی ویزے منسوخ کیے جانے سے متعلق سوشل میڈیا پر گردش کرنے والی خبروں کو اماراتی حکام نے مسترد کردیا ہے۔

متحدہ عرب امارات کے صدر کے مشیر ڈاکٹر انور قرقاش نے واضح کیا ہے کہ ویزوں کی منسوخی سے متعلق سوشل میڈیا پر پھیلائی جانے والی اطلاعات درست نہیں ہیں۔

انور قرقاش کے مطابق یو اے ای میں ویزوں کی منسوخی اور ایران کو مالی معاونت فراہم کرنے سے متعلق مختلف دعوے سوشل میڈیا پر گردش کررہے ہیں، تاہم ان میں کوئی حقیقت نہیں۔

انہوں نے کہا کہ موجودہ حالات میں افواہوں کا جواب افواہوں سے دینے کے بجائے عملی اقدامات اور زمینی حقائق کو سامنے لایا جائے گا۔

اماراتی مشیر کا کہنا تھا کہ خطے میں جاری صورتحال کے باعث متحدہ عرب امارات کی توجہ موجودہ حالات سے نمٹنے اور مستقبل کے لیے تیاری پر مرکوز ہے۔

ویزا منسوخی کی افواہیں ایسے وقت سامنے آئیں جب خطے میں کشیدگی کے باعث یو اے ای کی ویزا پالیسی کے حوالے سے سوشل میڈیا پر مختلف غیر مصدقہ دعوے تیزی سے پھیل رہے تھے۔ ان خبروں کے باعث وہاں کام کرنے والے غیر ملکی شہریوں میں بھی تشویش پیدا ہوئی۔

دوسری جانب متحدہ عرب امارات نے ایران سے متعلق بعض دیگر دعوؤں کو بھی مسترد کیا ہے اور خطے میں کشیدگی کم کرنے، جنگ بندی کی پاسداری اور آبنائے ہرمز کو کھولنے پر زور دیا ہے۔

حکام نے شہریوں اور غیر ملکی رہائشیوں کو مشورہ دیا ہے کہ ویزا، رہائش اور ملازمت سے متعلق کسی بھی خبر پر یقین کرنے سے پہلے اس کی تصدیق سرکاری ذرائع سے کی جائے۔

اس طرح یو اے ای میں ملازمت اور رہائشی ویزوں کی بڑے پیمانے پر منسوخی سے متعلق سوشل میڈیا پر گردش کرنے والی خبریں فی الحال بے بنیاد قرار دی گئی ہیں۔