آبنائے ہرمز سے گزرنے والے غیر ملکی جہازوں کو فیس دینا ہو گی، ایرانی پارلیمانی کمیٹی میں بل منظور

ایرانی پارلیمنٹ نے آبنائے ہرمز کی سیکیورٹی کے حوالے سے اہم مسودہ قانون کی دفعہ منظور کر لی، جس کے تحت بحری جہازوں پر خدمات کی فیس عائد کی جائے گی۔

ایرانی پارلیمنٹ کی قومی سلامتی کمیٹی نے ’’آبنائے ہرمز کی سیکیورٹی کو یقینی بنانے کے لیے اسٹریٹجک اقدام‘‘ کے نام سے پیش کیے گئے مسودہ قانون کی دفعہ 3 کی منظوری دے دی ہے۔

یہ بھی پڑھیں : ڈونلڈ ٹرمپ نے ایک ہفتے میں دوسری بار آبنائے ہرمز کو امریکی علاقہ قرار دے دیا

اس نئی قانون سازی کی شق کے تحت جن ممالک کے بحری جہازوں کو آبنائے ہرمز سے گزرنے کی اجازت ہو گی، انہیں اس گزرگاہ کے دوران فراہم کی جانے والی مختلف خدمات کے بدلے فیس ادا کرنا پڑے گی۔

ایرانی پارلیمانی کمیٹی کے مطابق اس فیس میں ماحولیاتی خدمات، ایندھن کی فراہمی، انشورنس اور تحفظ جیسی سہولیات شامل ہوں گی۔

یہ قانونی شق اس اسٹریٹجک قانون سازی کا حصہ ہے، جس کا مقصد عالمی توانائ کے لیے انتہائی اہم سمجھی جانے والی سمندری گزرگاہ آبنائے ہرمز کی سیکیورٹی کا نیا فریم ورک تیار کرنا ہے۔