عمان کے ساحل کے قریب آئل ٹینکر پر حملہ، انجن روم تباہ

عمان کے ساحل کے قریب ایک آئل ٹینکر پر نامعلوم شے لگنے سے اس کا انجن روم تباہ ہو گیا، جس کی تصدیق برطانوی بحری ایجنسی نے کر دی ہے۔

عمان کے شمالی علاقے الشیشہ سے تقریباً 17 کلومیٹر دور سمندر میں ایک آئل ٹینکر پر نامعلوم سمت سے آنے والی شے جا لگی، جس کے نتیجے میں ٹینکر کا انجن روم مکمل طور پر تباہ ہو گیا۔

برطانوی بحری تجارتی آپریشنز ایجنسی (یو کے ایم ٹی او) نے اس واقعے کی تصدیق کی ہے۔ رپورٹ کے مطابق 28 فروری کو ایران پر امریکی و اسرائیلی جنگ کے آغاز کے بعد سے آبنائے ہرمز اور خلیج عمان میں سفر کرنے والے جہازوں پر حملوں کے واقعات مسلسل سامنے آ رہے ہیں۔

یہ بھی پڑھیں : ایران نے آبنائے ہرمز کا زیادہ تر کنٹرول کھو دیا، عالمی ادارے کی رپورٹ میں دعویٰ

جنگ شروع ہونے کے بعد ایران نے عملی طور پر اس سمندری راستے کو جہاز رانی کے لیے بند کر دیا ہے، جس کے باعث روزانہ گزرنے والے جہازوں کی تعداد 130 سے کم ہو کر سنگل ڈیجیٹ میں رہ گئی ہے۔

یو کے ایم ٹی او نے گزشتہ چند ماہ کے دوران فجیرہ کے قریب نامعلوم اشیا سے متاثر ہونے والے کارگو اور آئل ٹینکرز کے متعدد واقعات کو ریکارڈ کیا ہے، جبکہ پاسداران انقلاب نے بھی خلاف ورزی کرنے والے جہازوں کے خلاف کارروائیوں کی ذمہ داری قبول کی ہے۔

واشنگٹن نے اگرچہ تجارتی جہازوں کو سیکیورٹی فراہم کرنے اور راستے کھلے رکھنے کا دعویٰ کیا تھا، لیکن امریکی کوششیں اس اہم سمندری راستے پر جہاز رانی کو جنگ سے پہلے کی حالت پر لانے میں ناکام رہی ہیں۔