مقبوضہ مغربی کنارے میں اسرائیلی فورسز کی فائرنگ، دو فلسطینی شہری شہید، صیہونی بستیوں میں توسیع

مقبوضہ مغربی کنارے میں اسرائیلی فورسز اور انتہا پسند یہودیوں کے حملوں میں شدید اضافہ ہو گیا۔ رام اللہ کے قریب المغیر گاؤں میں اسرائیلی فوج کی فائرنگ سے دو فلسطینی شہری شہید ہو گئے۔

مقبوضہ مغربی کنارے میں اسرائیلی قابض فورسز اور انتہا پسند اسرائیلی آبادکاروں کی جانب سے جارحیت اور چھاپہ مار کارروائیوں میں شدید تیزی آ گئی ہے۔

رام اللہ کے شمال مشرق میں واقع گاؤں المغیر میں اسرائیلی فورسز نے فلسطینی نوجوانوں پر براہ راست فائرنگ کر دی، جس کے نتیجے میں دو فلسطینی شہری شہید ہو گئے۔

یہ واقعہ اس وقت پیش آیا جب قابض فورسز نے پورے گاؤں کا سخت محاصرہ کر رکھا تھا۔ اس سے قبل انتہا پسند اسرائیلی آبادکاروں نے اسرائیلی فورسز کی سرپرستی میں المغیر گاؤں پر حملہ کیا، گھروں کو نشانہ بنایا اور گاؤں کے مغربی حصے میں کئی مکانات کو گھیرے میں لے کر شہریوں کو ہراساں کیا۔

فلسطینی اطلاعاتی مرکز کے مطابق مسلح آبادکاروں نے اسرائیلی فوج کی مکمل حفاظت میں گاؤں کا محاصرہ جاری رکھا۔ اس دوران مغربی کنارے کے دیگر حصوں میں بھی شدید جھڑپیں اور چھاپے دیکھنے میں آئے۔

یہ بھی پڑھیں : ایرانی حملوں نے امریکی بحریہ کی سپلائی چین توڑ دی، مشرق وسطیٰ میں موجود جنگی جہاز شدید مشکلات کا شکار

الخلیل کے شمال میں واقع العروب پناہ گزین کیمپ پر بھی اسرائیلی فورسز نے چھاپہ مارا اور فلسطینی نوجوانوں پر برسرعام گولی باری کی۔ اسی طرح قلقلیہ کے مشرق میں واقع قصبے عزون اور نابلس کے جنوب میں واقع بیٹا کے علاقے جبل کرم النمر میں بھی فورسز نے گھس کر توڑ پھوڑ کی اور آپریشن کیا۔

پورے مقبوضہ مغربی کنارے اور القدس میں اسرائیلی فوج اور آبادکاروں کے مظالم مسلسل بڑھ رہے ہیں۔ محض دو دن پہلے، اسرائیلی فورسز نے رام اللہ کے شمال میں واقع بیرزیت کے علاقے عین الساقی میں دو رہائشی عمارتوں کو بلڈوز کر کے زمین بوس کر دیا تھا۔ اس کارروائی کی کوریج کرنے والے صحافیوں پر بھی انتہا پسند آبادکاروں نے حملہ کیا تاکہ وہ اس ظلم کی تصاویر اور خبریں دنیا تک نہ پہنچا سکیں۔

دوسری جانب بیت لحم کے ارد گرد صہونی بستیوں کو پھیلانے کا کام تیز کر دیا گیا ہے۔ المنیا گاؤں کے مشرق میں قرنات کے علاقے میں آبادکاروں نے ایک نئی بستی کے لیے انفراسٹرکچر کی تعمیر شروع کر دی ہے۔

اس کے ساتھ ہی بیت لحم کے مغرب میں واقع نھالین کے علاقے میں فلسطینیوں کی ملکیت زمینوں کو بلڈوز کرنے کا عمل مسلسل جاری ہے۔ یہ بلڈوزنگ وادی الجملہ اور ارض الکبارات کے علاقوں میں کی جا رہی ہے جو پہلے سے موجود بیتر الیت بستی کے بالکل نیچے واقع ہے، تاکہ اس بستی کی سرحدوں کو مزید وسیع کیا جا سکے۔

مغربی کنارے میں نئی بستیوں کی تعمیر اور پرانی بستیوں کی توسیع اب الگ تھلگ واقعات نہیں رہے بلکہ ایک منظم منصوبے کے تحت کی جا رہی ہے۔ قابض حکام اور آبادکار ان عارضی بستیوں میں سڑکیں، پانی، بجلی اور سیوریج کا نظام فراہم کر کے انہیں مستقل شہروں میں تبدیل کر رہے ہیں۔

حال ہی میں دیوار و بستی مخالف مزاحمتی کمیشن نے انکشاف کیا ہے کہ اسرائیلی ملٹری کی سنٹرل کمانڈ کے سربراہ نے 25 اگست 2026 کو ایک حکم نامے پر دستخط کیے ہیں، جس کے تحت مغربی کنارے میں 18 نئی اور ترمیم شدہ بستیوں کے رقبے کی منظوری دے دی گئی ہے، تاکہ فلسطینیوں کی مزید زمینوں پر قبضہ کیا جا سکے۔