عالمی مارکیٹ میں خام تیل کی قیمتیں 100 ڈالر فی بیرل کے قریب پہنچ گئیں

امریکہ اور ایران کے درمیان بڑھتے ہوئے عسکری تصادم اور خلیج کے علاقے میں بحری جہازوں پر حملوں کے نتیجے میں عالمی منڈی میں خام تیل کی قیمتیں مسلسل چوتھے روز بھی اضافے کے ساتھ 100 ڈالر فی بیرل کی سطح کے قریب پہنچ گئی ہیں۔

عالمی معاشی منڈی میں خام تیل کی قیمتوں میں مسلسل چوتھے سیشن میں بھی تیزی کا رجحان برقرار رہا۔ تازہ ترین اعداد و شمار کے مطابق برینٹ کروڈ فیوچرز کی قیمت 1.57 ڈالر یعنی 1.6 فیصد کے اضافے کے بعد 99.49 ڈالر فی بیرل تک جا پہنچی ہے۔

یہ بھی پڑھیں : ایران کی جوابی کارروائی، اردن میں امریکی ازرق ایئر بیس پر درجنوں بیلسٹک میزائلوں سے حملہ

اسی طرح امریکی ویسٹ ٹیکساس انٹرمیڈیٹ (ڈبلیو ٹی آئی) کی قیمت میں 1.60 ڈالر یعنی 1.72 فیصد کا اضافہ ہوا، جس سے اس کی فی بیرل قیمت 94.63 ڈالر ہو گئی ہے۔

قیمتوں میں اس شدید اضافے کی بنیادی وجہ ایران کی جانب سے خلیج میں امریکی عسکری اثاثوں اور تجارتی جہازوں پر کیے جانے والے نئے حملے ہیں، جس کے باعث واشنگٹن اور تہران کے درمیان جاری جنگ کے اثرات پورے خطے کی معیشت پر پھیل رہے ہیں۔

گزشتہ 6 ماہ سے جاری اس جنگ کے مستقل حل کی امیدیں دم توڑنے اور لڑائی میں دوبارہ شدّت آنے کی وجہ سے اگست کے اوائل سے لے کر اب تک برینٹ کروڈ کی مجموعی قیمتوں میں 25 فیصد یعنی ایک چوتھائی تک کا بڑا اضافہ دیکھا گیا ہے، جس سے عالمی سطح پر مہنگائی کا ایک نیا طوفان اٹھنے کا خدشہ ظاہر کیا جا رہا ہے۔