اسرائیلی وزیراعظم نیتن یاہو کا یو اے ای کا خفیہ دورہ، اماراتی صدر سے بند کمرہ ملاقات

اسرائیلی وزیراعظم نے مشرقِ وسطیٰ میں جاری شدید کشیدگی کے دوران متحدہ عرب امارات کا خفیہ دورہ کیا اور اماراتی صدر شیخ محمد بن زاید سے ملاقات کی۔

مشرقِ وسطیٰ میں جاری طاقت کے حالیہ تنازعات اور سکیورٹی بحران کے پس منظر میں اسرائیلی وزیراعظم بنیامین نیتن یاہو نے اتوار کے روز ابوظہبی کا ہنگامی اور غیر اعلانیہ دورہ کیا۔

اس دورے کے دوران نیتن یاہو نے اماراتی صدر شیخ محمد بن زاید النہیان سے تقریباً ایک گھنٹے تک بند کمرے میں تفصیلی ملاقات کی۔

چونکہ اس دورے کا پہلے سے کوئی سرکاری یا باضابطہ اعلان نہیں کیا گیا تھا، اس لیے اس سفارتی پیشرفت نے عالمی میڈیا میں ہلچل مچا دی ہے۔

باخبر سفارتی ذرائع نے نام ظاہر نہ کرنے کی شرط پر اس ملاقات کی تصدیق کی ہے، جبکہ ذرائع کا یہ بھی بتانا ہے کہ اس ملاقات کا بنیادی مقصد ایک معروف اسرائیلی اخبار کی حالیہ رپورٹ تھی، جس میں یہ دعویٰ کیا گیا تھا کہ اماراتی صدر نے حماس کے حملے سے کچھ عرصہ قبل نیتن یاہو کو ممکنہ خطرے سے باقاعدہ خبردار کیا تھا۔ نیتن یاہو اس ملاقات میں مبینہ طور پر اس رپورٹ کی تردید کرنے کے خواہاں تھے۔

یہ بھی پڑھیں : ایران امریکا اور اسرائیل کے جنگی جرائم پر انصاف کا مطالبہ کبھی نہیں چھوڑے گا، عباس عراقچی

اس خفیہ ملاقات کا وقت اس لحاظ سے بھی انتہائی اہمیت کا حامل ہے کیونکہ اس وقت پورا خطہ بیک وقت کئی بڑے بحرانوں کی لپیٹ میں ہے۔

ایک طرف امریکہ اور ایران کے درمیان براہِ راست اور بالواسطہ محاذ آرائی جاری ہے، تو دوسری طرف یمن میں حوثیوں اور سعودی حمایت یافتہ فورسز کے درمیان مسلح تصادم دوبارہ شدت اختیار کر چکا ہے۔

اس کے علاوہ بحیرۂ احمر اور باب المندب کے اہم بحری راستوں پر تجارتی جہازوں اور توانائی کی ترسیل کو مسلسل سکیورٹی خطرات لاحق ہیں۔

دوسری جانب، یورپی یونین کی اعلیٰ سفارت کار کایا کالاس کے مطابق یورپی یونین بھی سعودی عرب کی قیادت میں قائم ہونے والی نئی میری ٹائم دفاعی شراکت داری میں مبصر کا درجہ حاصل کرنے کی کوشش کر رہی ہے۔

اس تمام صورتحال کے باوجود اماراتی وزارتِ خارجہ نے اس ملاقات کی اندرونی تفصیلات پر تبصرہ کرنے سے گریز کیا ہے، البتہ یہ مؤقف اپنایا گیا ہے کہ متحدہ عرب امارات اسرائیل کے ساتھ اپنے کھلے اور براہِ راست رابطے بدستور برقرار رکھے گا۔