سری لنکن کرکٹر دانشکا پر سے پابندی ختم، کرکٹ کی اجازت بھی مل گئی

سڈنی: چند ہفتوں قبل سڈنی کی عدالت سے بری ہونے والے سری لنکن کرکٹر دانشکا گونا تھیلاکا پر سے تمام پابندیاں ختم کردی گئیں۔

سری لنکا کرکٹ کے مطابق دانشکا گونا تھیلاکا نے آسٹریلیا میں ٹرائل مکمل کیا اور تمام صورتحال کا جائزہ لینے کے بعد کمیٹی نے فوری طور پر کرکٹر سے پابندی اٹھانے کی تجویز دی۔

سری لنکن کرکٹ کے مطابق سری لنکا کرکٹ کی ایگزیکٹو کمیٹی نے تجویز کو منظور کر لیا ہے جس کے بعد دانشکا کو ہر طرح سے کھیلنے کی اجازت ہے اور وہ قومی ٹیم کی نمائندگی کے اہل ہیں۔

یہ بھی پڑھیں: سری لنکن کرکٹر دانشکا پر سے جنسی زیادتی کے 3 الزامات واپس لے لیے گئے

واضح رہے کہ سری لنکا کرکٹ نے دانشکا گونا تھیلاکا کی گرفتاری پر تحقیقات کیلئے انڈیپینڈنٹ کمیٹی تشکیل دی تھی، کرکٹر کو نومبر 2022 میں تمام فارمیٹ سے معطل کردیا گیا تھا۔

بعد ازاں نومبر 2022 میں ریپ الزام میں دانشکا گونا تھیلاکا کو گرفتار کیا گیا تاہم انہیں سڈنی کی عدالت نے بری کیا تھا۔