128 سال بعد اولمپکس میں کرکٹ کی واپسی، لاس اینجلس میں کرکٹ اسٹیڈیم کا سنگ بنیاد رکھ دیا گیا

انٹرنیشنل کرکٹ کونسل نے لاس اینجلس میں ہونے والے اولمپکس 2028 کے لیے مخصوص کرکٹ اسٹیڈیم کی تعمیر کے آغاز کو کھیل کی تاریخ کا ایک عظیم سنگ میل قرار دیا ہے۔

لاس اینجلس کاؤنٹی کے شہر پومونا میں ایک باضابطہ گراؤنڈ بریکنگ تقریب منعقد کی گئی، جس کا مقصد 128 سال کے طویل وقفے کے بعد اولمپکس میں کرکٹ کی واپسی کی تیاریوں کا آغاز کرنا تھا۔

آئی سی سی کے چیئرمین نے اس موقع پر اپنے پیغام میں کہا کہ کرکٹ ایک عالمی کھیل کے طور پر تیزی سے ترقی کر رہی ہے اور اولمپکس میں اس کی شمولیت دنیا بھر کے ڈھائی ارب شائقین کے لیے فخر کا باعث اور ایک دیرینہ خواب کی تعبیر ہے۔

اولمپک مقابلوں کے لیے تعمیر ہونے والا یہ اسٹیڈیم امریکہ میں کرکٹ کے ڈھانچے کو مضبوط بنانے اور کھیل کی مقبولیت میں اضافے کے لیے کلیدی کردار ادا کرے گا۔

آئی سی سی کے چیف ایگزیکٹو کے مطابق اولمپکس میں واپسی سے کرکٹ کی عالمی رسائی میں غیر معمولی اضافہ ہوگا اور یہ کھیل نئے خطوں تک پہنچے گا۔

یہ بھی پڑھیں : کرکٹ آسٹریلیا کا سینٹرل کنٹریکٹ جاری، گلین میکسویل جیسا بڑا نام ڈراپ

لاس اینجلس اولمپکس میں کرکٹ کے مقابلے ٹوئنٹی 20 فارمیٹ میں منعقد ہوں گے، جس میں مردوں اور خواتین کی ٹیمیں ٹائٹل کے لیے مدمقابل ہوں گی۔

کرکٹ ماہرین کا کہنا ہے کہ اس اقدام سے نہ صرف موجودہ کھلاڑیوں کو ایک بڑا پلیٹ فارم ملے گا بلکہ نئی نسل کو بھی اس کھیل کی طرف راغب کرنے میں بڑی مدد ملے گی۔

تقریب کے دوران شرکاء کا کہنا تھا کہ کرکٹ کے ایک نئے عالمی دور کا آغاز ہو رہا ہے اور امریکہ جیسے نئے خطے میں کرکٹ کا فروغ کھیل کی معیشت اور مقبولیت دونوں کے لیے سودمند ثابت ہوگا۔

آئی سی سی اس منصوبے کی بھرپور سرپرستی کر رہی ہے تاکہ 2028 تک تمام انتظامات عالمی معیار کے مطابق مکمل کیے جا سکیں۔ اس اسٹیڈیم کی تعمیر سے امریکہ میں کرکٹ کھیلنے والے مقامی ٹیلنٹ کو بھی اپنی صلاحیتیں نکھارنے کا موقع ملے گا۔