محمد صلاح کے جادوئی گول کی بدولت مصر نے نیوزی لینڈ کو ہرا دیا

مصر کے اسٹار فٹ بالر محمد صلاح کے شاندار گول اور بہترین کھیل کی بدولت مصر نے نیوزی لینڈ کو 1-3 سے شکست دے کر ورلڈ کپ کی تاریخ میں اپنی پہلی کامیابی حاصل کر لی۔

وینکوور میں کھیلے گئے ورلڈ کپ کے گروپ جی کے ایک انتہائی اہم میچ میں مصر نے شاندار واپسی کرتے ہوئے نیوزی لینڈ کو 1-3 سے ہرا دیا۔

اس میچ کی خاص بات لیورپول کے اسٹار کھلاڑی محمد صلاح کا گول تھا، جو اس ٹورنامنٹ میں ان کا پہلا گول ہے۔ ہاف ٹائم تک مصر کی ٹیم 1-0 سے پیچھے تھی کیونکہ نیوزی لینڈ کے فن سورمین نے میچ کے 15 ویں منٹ میں ایک بہترین ہیڈر کے ذریعے گول کر کے اپنی ٹیم کو برتری دلا دی تھی۔ لیکن دوسرے ہاف میں مصر کے کھلاڑیوں نے میچ کا رخ ہی بدل دیا۔

مصر کی طرف سے مصطفیٰ زیکو نے 58 ویں منٹ میں محمد ہانی کے بہترین کراس پر ہیڈ کے ذریعے گول کر کے اسکور 1-1 سے برابر کر دیا۔

اس کے بعد 67 ویں منٹ میں محمد صلاح نے مصطفیٰ زیکو کے پاس پر بائیں پاؤں سے شاندار گول داغ کر مصر کو 1-2 کی برتری دلائی۔

یہ بھی پڑھیں : ورلڈ کپ میں سست کارکردگی کے بعد رونالڈو شدید تنقید کی زد میں آگئے

یہ محمد صلاح کا 68 واں انٹرنیشنل گول تھا، جس کا جشن انہوں نے اسٹیڈیم میں موجود ہزاروں مصری فینز کے سامنے منایا۔ میچ کے 82 ویں منٹ میں تریزیگے نے محمد صلاح کی فری کک پر ایک اور خوبصورت گول کر کے مصر کی جیت پر مہر لگا دی۔ یہ تریزیگے کا ورلڈ کپ میں پہلا گول تھا۔

جب میچ کے 85 ویں منٹ میں محمد صلاح کو متبادل کھلاڑی کے طور پر باہر بلایا گیا، تو پورے اسٹیڈیم نے کھڑے ہو کر تالیاں بجا کر انہیں الوداع کیا۔

مصر کے گول کیپر مصطفیٰ شوبیر اور نیوزی لینڈ کے میکس کروکومبے دونوں نے میچ کے دوران 4، 4 بہترین بچاؤ کیے۔ میچ کے بعد محمد صلاح نے خوشی کا اظہار کرتے ہوئے کہا کہ آنے والے برسوں میں اس جیت کو تاریخ کی ایک بڑی کامیابی کے طور پر یاد رکھا جائے گا۔

انہوں نے کینیڈا کے اسٹیڈیم میں مصری مداحوں کی بڑی تعداد کا شکریہ ادا کرتے ہوئے کہا کہ ایسا لگ رہا تھا، جیسے ہم مصر کے اندر ہی کھیل رہے ہیں۔

اس جیت کے بعد مصر کی ٹیم گروپ جی میں سب سے اوپر آ گئی ہے اور جمعے کے روز ایران کے خلاف ان کا آخری گروپ میچ ہوگا، جہاں ان کا اگلے مرحلے میں پہنچنا تقریباً پکا ہے۔ دوسری طرف نیوزی لینڈ کی ٹیم اب اگلا میچ بیلجئیم کے خلاف کھیلے گی۔