ٹرمپ کی مداخلت بھی کام نہ آئی، بیلجئیم نے امریکہ کو فٹبال ورلڈ کپ سے باہر کردیا

عالمی کپ کے سنسنی خیز مقابلے میں بیلجئیم نے امریکہ کو 1-4 سے شکست دے کر کوارٹر فائنل میں جگہ بنا لی ہے۔

بیلجئیم نے عالمی کپ کے راؤنڈ آف 16 کے میچ میں میزبان ملک امریکہ کو بری طرح ہرا کر ٹورنامنٹ سے باہر کر دیا۔ بیلجئیم کی جیت میں چارلس ڈی کیٹیلیئر نے شاندار کارکردگی دکھاتے ہوئے 2 گول کیے۔

امریکہ کی یہ ہار اس کے اپنے ہوم گراؤنڈ پر ایک بڑا جھٹکا ہے، اور وہ کینیڈا اور میکسیکو کے بعد ٹورنامنٹ سے باہر ہونے والا تیسرا میزبان ملک بن گیا ہے۔

میچ سے پہلے تمام تر توجہ امریکی سٹرائیکر فولارین بالوگن پر مرکوز تھی کیونکہ امریکی صدر ڈونلڈ ٹرمپ نے فیفا سے ان کے ریڈ کارڈ کی وجہ سے لگی ایک گیم کی پابندی پر نظرثانی کی درخواست کی تھی، جسے فیفا نے متنازع طور پر قبول کر لیا تھا۔

یہ بھی پڑھیں : فیفا کا امریکی صدر ڈونلڈ ٹرمپ کی تنقید کے بعد ریفری رافیل کلاؤس کی بھرپور حمایت

بیلجئیم کے کوچ روڈی گارسیا نے میچ میں بڑا فیصلہ کرتے ہوئے کیون ڈی بروئن اور جیریمی ڈوکو جیسے بڑے کھلاڑیوں کو بنچ پر بٹھایا، جو کہ درست ثابت ہوا۔ چارلس ڈی کیٹیلیئر نے 9 ویں منٹ میں ہی پہلا گول کر کے امریکی تماشائیوں کو خاموش کر دیا۔

اگرچہ امریکہ کے ملک ٹلمین نے فری کک پر گول کر کے اسکور 1-1 برابر کر دیا تھا، لیکن چارلس نے 33 ویں منٹ میں ایک اور گول کر کے بیلجئیم کو پھر برتری دلا دی۔

دوسرے ہاف میں امریکی گول کیپر میٹ فریز کی ایک فاحش غلطی کا فائدہ اٹھا کر ہانس واناکین نے تیسرا گول کیا، اور میچ کے آخری منٹوں میں رومیرو لوکاکو نے چوتھا گول کر کے امریکہ کی امیدوں پر پانی پھیر دیا۔

امریکی کپتان کرسچن پلسک بھی میچ کے دوران زخمی ہو کر باہر ہو گئے، جس سے امریکی ٹیم بے بس دکھائی دینے لگی اور 2002 کے بعد پہلی بار کوارٹر فائنل میں پہنچنے کا ان کا خواب ٹوٹ گیا۔