انگلینڈ کرکٹ بورڈ نے برینڈن میکولم کو ٹیسٹ ہیڈ کوچ کے عہدے سے برطرف کر دیا

انگلینڈ اینڈ ویلز کرکٹ بورڈ نے خراب کارکردگی کے باعث برینڈن میکولم کو ٹیسٹ ٹیم کے ہیڈ کوچ کے عہدے سے فوری طور پر ہٹا دیا ہے، تاہم وہ وائٹ بال ٹیموں کے ساتھ کام جاری رکھیں گے۔

انگلینڈ اینڈ ویلز کرکٹ بورڈ یعنی ای سی بی نے ایک بڑا فیصلہ کرتے ہوئے برینڈن میکولم کو انگلینڈ کی ٹیسٹ ٹیم کے ہیڈ کوچ کے عہدے سے برطرف کر دیا ہے۔

تاہم وہ محدود اوورز یعنی وائٹ بال ٹیموں کے کوچ کے طور پر اپنی ذمہ داریاں نبھاتے رہیں گے۔ اس اچانک فیصلے کے بعد انگلش ٹیسٹ ٹیم اس وقت کسی کپتان اور کوچ کے بغیر رہ گئی ہے۔

یہ تبدیلی ایک ایسے وقت میں آئی ہے، جب صرف 3 ماہ پہلے ہی بورڈ نے آسٹریلیا کے خلاف ایشز سیریز میں 4-1 سے عبرتناک شکست کے باوجود میکولم کی حمایت کا اعلان کیا تھا۔

یہ بھی پڑھیں : انگلینڈ نے بھارت کو چوتھے ٹی ٹوئنٹی میں ہرا کر سیریز میں 4-0 سے کلین سویپ کر دیا

برینڈن میکولم نے اس فیصلے پر گہرے دکھ کا اظہار کرتے ہوئے کہا کہ وہ اس نوکری کو کھونے پر ٹوٹ چکے ہیں، جس سے وہ بے پناہ محبت کرتے تھے، لیکن وہ بورڈ کے فیصلے کا احترام کرتے ہیں۔ اب ان کی تمام تر توجہ وائٹ بال ٹیم کو آگے لے جانے پر ہوگی۔

ای سی بی کے چیف ایگزیکٹو رچرڈ گولڈ کا کہنا ہے کہ نیوزی لینڈ کے خلاف ہوم سیریز میں 2-1 سے شکست کے بعد یہ تبدیلی ضروری ہو گئی تھی کیونکہ اگلے سال ہونے والی ایشز سیریز میں اب 12 مہینوں سے بھی کم کا وقت رہ گیا ہے۔

میکولم نے 2022 میں چارج سنبھالا تھا اور ان کے دور میں انگلینڈ نے 11 میں سے 10 میچز جیتنے کا ریکارڈ بنایا تھا، لیکن حالیہ دنوں میں ٹیم کی کارکردگی خراب ہو گئی اور آخری 9 ٹیسٹ میچوں میں سے ٹیم کو 7 میں شکست کا سامنا کرنا پڑا۔

بورڈ نے نئے ٹیسٹ کوچ کی تلاش فوری طور پر شروع کر دی ہے اور ممکنہ امیدواروں میں اینڈریو فلنٹوف، جسٹن لینگر اور اینڈی فلاور کے نام شامل ہیں۔