پاکستان کرکٹ ٹیم کے سابق کپتان سرفراز احمد کے بہنوئی عامر وحید صدیقی انتقال کر گئے

پاکستان کرکٹ ٹیم کے سابق کپتان اور موجودہ قومی ٹیسٹ ٹیم کے کوچ سرفراز احمد کے بہنوئی عامر وحید صدیقی انتقال کر گئے۔

خاندانی ذرائع کے مطابق عامر وحید صدیقی گزشتہ روز عمان میں انتقال کر گئے۔ ان کی نماز جنازہ عمان ہی میں ادا کی گئی، جس کے بعد انہیں مقامی قبرستان میں سپرد خاک کر دیا گیا۔ مرحوم کے انتقال پر اہل خانہ اور قریبی عزیز غمزدہ ہیں۔

ذرائع کے مطابق عامر وحید صدیقی کراچی ریجن کرکٹ سے وابستہ معروف شخصیت ضیاء صدیقی کے چھوٹے بھائی تھے۔ صدیقی خاندان کا کراچی کی کرکٹ اور کھیلوں کی سرگرمیوں سے طویل عرصے سے تعلق رہا ہے۔ اسی وجہ سے مرحوم کے انتقال کی خبر نے کھیلوں سے وابستہ افراد کو بھی افسردہ کر دیا۔

عامر وحید صدیقی کے انتقال پر مختلف کرکٹ شخصیات اور سرفراز احمد کے قریبی حلقوں کی جانب سے تعزیت کا اظہار کیا گیا۔ سماجی، سیاسی اور کھیلوں سے تعلق رکھنے والی شخصیات نے بھی سوگوار خاندان سے دلی ہمدردی کا اظہار کرتے ہوئے مرحوم کے لیے دعائے مغفرت کی۔